– Подув вöчöм да сылöн кынмöм бöрын бруссьыд керкатö дас лунöн и вайöдам вевт улöдз. Кулöмдiн паськалö, керка кыпöдöм могысь сеталöны му юкöнъяс, да ёнджыкасö юрсиктын и уджалам, – сёрнитiс Михаил Николаевич Игнатов.

Том морт стрöитчöмын 15 во нин. А сямыс, пельклуныс да стöчлуныс пö Николай Андриянович батьсянь. Сiйö кыпöдлiс ас керка да горт дорас мукöд стрöйба. Пыр тай колö мыйкö дзоньтавны-выльмöдны да вежыштны. Вöчасянiнас пыр вöлi дзим-дзурк, ставыс аслас местаын, уджö босьтчигöн медводз ставсö арталiс-донъялiс. Куимнан пиыс пыр вöлiсны орччöн, челядьдырсянь нин вöдитчисны инструментъясöн, бать вылö видзöдöмöн и велалiсны став уджас.

Ас кадö Михаил Николаевичöс аслас бригадаас корис асшöр уджалысь Иван Ахабиевич Зайков. Сы дорын и босьтчис да водзö сöвмöдiс сямсö. Уджалiс и Василий Васильевич Рассыхаевкöд. Кык-куим во мысти ачыс нин петiс ас нянь вылö. Сы дорö локтiс Андриян вокыс, кодi водзтi уджалiс жö Иван Ахабиевич дорын. Талун бригадаас аскöдыс нёль морт. Ошкис Владимир Иванович Кузнецовöс, зэв пö киподтуя том морт.

Михаил Николаевич пыр выльмöдö, ньöбö öнiя кадся инструментъяс нин. Сы дорö йöзыс шыöдчöны ёна водз. Кодкö да корö кыпöдны керка дась бала серти, сöмын öтлаын стöчмöдыштöны, колö кö лöсьöдыштöны. Овлö и, мый шыöдчысьяс корöны вöчны баласö. Вöлисти Михаил Николаевич ылöсалö стрöитчöм вылö сьöм.

Бригадаыс нöшта выльмöдö керка, пывсян да мукöд стрöйба подувъяс, вежöны вевт, кодлы кö лэптöны стрöпилö вылö. Вöчöны и пытшкöс уджъяс, но ёнджыка тöвнас. Талун уджалöны Кулöмдiнлöн Юбилейнöй юкöнын, кöнi кыпалöны выль керкаяс. Таысь öтдор колö на пö лэптыны кык керка. Кадöн оз артасьны, колöкö, уджалöны и шойччан лунъясö, сöмын пыдди пуктöны Ен ыджыд праздникъяс, Победа да мукöд тöдчана лунъяс.

Марина Дадашова.
Снимок Владимир Кузнецовлöн.31Оценил 31 человек12