Кулöмдiн районса туй вöчан предприятиеын инженерöн 50 во уджалiс Любовь Семёновна Баско. Россияса почёта туй вöчысь, Коми республикаса заслуженнöй уджалысь, уджвывса ветеран. Чужлöма шоныд Воронежса му вылын, шöр школа бöрын велöдчöма туй вöчысьяслöн техникумын, диплома том специалистлы удж места вöзйöмаöсь куимлаö. Мыйлакö бöрйöма «Комиавтодор».

 — Туй вöчöмыд — збыльысь ыджыд удж, весиг сы кежлö дасьтысьöмсяньыс на. Балатö вöчигöн колö ставсö стöча артыштны сьöм, йöз, техника боксянь, медым уджъяс мунiсны шыльыда. Ме вöлi эг сöмын инженерöн, но и планово-производственнöй юкöнын веськöдлысьöн, уджъяссö вöчысьöн. Öнi на быттьö кыла сьöлöм вылын нимкодьлун, кор помалам вöлi панöмасö. 1976-öд воын воссис асфальт завод, из кутiм перйыны асланым районлöн карьерысь….

 1986-öд вося октябрын кыпыда восьтiсны Сыктывкар-Кулöмдiн туй. Митингыс вöлi Вишера ю вомöн выль пос вылын. Веськыд туйöд позис воöдчыны 3 часöн, бокö колисны сикт-грездъяс, выль трасса дженьдаммис 14 километр…
А туй вöчöм мунiс водзö Ухталань да Мылдiнлань. 2000-öд вося арын восьтiсны Эжва вомöн пос. Во гöгöрся туй лоис Носимса, Дереваннöйса, Ручса, Аныбса, Керчомъяса да Зимстанса олысьяслы, — казьтылiс воддзасö Любовь Семёновна.

 Коллективлöн вермöмъясыс — йöз сайын, кодъяс быдлаын петкöдлiсны зiльлун, эз артасьны кадöн. Любовь Семёновна унаöс лыддьöдлiс татшöмъяс лыдас. Но ставнысö гижны он вермы. Бöрпомас корис ассяньыс чолöмавны туй вылын уджалысьяслöн лунöн!
Водзö лыддьöй октябр 18-öд лунся газетысь.
Нина Буткина.
 Снимокъяс Любовь Басколöн да редакциялöн чукöртöмысь.