Лидия Прокофьевна Паршукова чужис 1938–öд вося май 1 лунö. Кор ми локтiм сы дорö обöн шуысьыскöд, олöма ань пырö вöлi гортас, эштöдöма морков-свеклö идралöм да. Лöсьöдчим чай юны да сэсся и сёрнитыштiм. Век пöся вочаалö гöсьтъястö. Водзтi кöть кор, кодi да кöть кымынöн эз пырны, пызан вывсö синма-ныра косттi тыртас: пуöма утка-пöтка яя шыд, жаритöмa-пражитöма чери, пöжалöма шаньга-пирöг. И кöзяиныс и пияныс вöлiсны бур кыйсьысьясöн, век налы, енсыкöдöн, шедлiс. И öнi кöть абу важся кодь сюсьлуныс, прöстöн пукавны оз куж.
Лидия Прокофьевналöн вöлiс кык вок да кык чой. Некод нин абу ловъя.
Батьыс война бöрын гортас локтiс паракодöн. Ме пö аддзи да «Батьö локтö!» горзöмöн котöртi кузь улича кузя. Окота пö вöлi кайны паракод вылас, да эз лэдзны. Но кувсис водз, кыйсигöн. Мамыс олiс дыр – пöшти 90 арöсöдз.

Кадыд тай век мунö водзö. 22 арöсын петiс верöс сайö, чужис нёль челядь – кык пи да кык ныв: Юрий, Коля, Тоня, Вера. Деревняад сэки уджыд вöлiс, уджалiс разнорабoчöйöн. Гожöмнaс заптiсны кöрым: ытшкисны гöрбушöн, куртiсны, юралiсны, чöвтiсны. Том ныв век талялiс зорöд, шулiсны бура пö артмö да. А тöвнас Вапöлкаысь вöлöн ваялiсны турун. Доддьö сöвтiсны кыкöн – öтиыс шыблалiс, мöдыс талялiс. Локтiг-мунiг öдва эз кынмавлыны, пасьтавлiсны тулупъяс, чеччылiсны да мунлiсны подöн. Абу шутка: медводз кайисны 20 километр, а сэсся сы мында жö колiс и лэччыны, мед воöдчыны гортад. Сэсся и гортад на скöт да челядь, ставсö колiс эштöдны.

Кутшöмкö кадö уджалiс кукань видзысьöн. Сэсся петiс лысьтысьысьö Кöджувдорö, ачыс олiс нин Куръядорын, а костыс куим километра. Васö вöлi шонтöны ывлаын ыджыд бöчкаын, кaян поскöн, гумовтан да лэччöдан, а öд эз öти ведра ков. Тöвнад да арнад асыв и рыт мунан и локтан пемыдöн. Öтчыд повзьылiс, сэки вед вöлi и вöвъяс видзöны. Муна пö вöлi туй бокöдыд, а вöвъясыд узьмöдчöмаöсь да другысь тай кыдз чеччисны… Лысьтысьысьöн сэсся уджалiс пенсия вылö петтöдз. Бура уджалöмысь пасйылiсны грамотаясöн, мöдöдлiсны конференция вылö.
Томöн колис дöваöн. Öнi олö Тоня нылыскöд, Вера мöд нылыс олö Югыдъягын – оз тшöкыда и волывлы. Пияныс абу нин ловъяöсь, Коляыс важöн нин кувсьылiс. Олöмыс пö вöлi бур, кор вöлiны кöзяин да Юрий пиыс, но и сiйö неважöн кувсис. Сылöн кувсьöм бöрын пö сьöлöм вылын ой-ё-ой сьöкыд.

Но век тай олам водзö, век на видзö баляясöс, ачыс вöчö ставсö – ог пö некодлы дöверит. Отсасьны волывлöны обöн шуысь Анна да вежаньöн шуысь Вова, да внучка Нина. Мед сöмын дзоньвидзалун пö лоыштас, сэсся нинöм оз ков.
Гижöд лöсьöдiгкосттi Лидия Прокофьевнаöс суис нöшта öти шог: неминучöн кувсис Тоня нылыс, кодкöд вöлi олö.
Людмила Игнатова.
Снимок олöмаяслöн котырлöн.