Кольöм нэмся 80-öд воясын мöсъяслысь йöв содтöм могысь вайлiсны да кöдзлiсны азьгум. Гöгöрвоана, сэки эз ясыда тöдны, мый совхозъяслöн нэмыс лоас дженьыд, а тайö быдмöгыс пыдö вужъясяс, мынтöдчыны лоас зэв сьöкыд, да мый мортлöн дзоньвидзалунлы вермас вайны ыджыд лёк. Öд инмöдчылöмöн либö ытшкигöн сотö мортлысь кучиксö.

Сюрукъяс, дерт, сёйлiсны вель азыма сöмын на петöм турунтö. Да и йöвныс содлiс тöдчымöн. Вöчлiсны и силос. Тулыснас неуна быдмыштöм бöрын дзик пыр ытшкылiсны, сэсся бара, тадзи гожöмбыд. Та вöсна быдмöг дзоридзавны эз удитлы, сiдзкö эз и паськав. А совхозъяс бырöмöн кыз кока азьгум босьтчис тыр öдöн паськавны да пöдтыны сиктса олысьясöс. Öнi йöз мынтöдчöны уна ногöн, кодi вужъяс кисьтö уксус, кодi краска сывдысь (растворитель), кодi лавкаысь ньöбöм химия. Но ёна паськалöм нин быдмöг оз сетчы, быттьö, мöдарö, öддзöмöн öддзö. Но векжö овмöдчöминъясын водзсасьöны. Кольöм воын Куж овмöдчöминын босьтчисны пöдтыны яд да химия отсöгöн. Гожöмнас «ДезКоми» котыр кыкысь резiс 0,8 квадрата метра, та вылö урчитлiсны 50 сюрс шайт. Таво – 30 сюрс шайт. Сиктса юралысь Жанна Васильевна Мартюшева пасйис, мый дзикöдз азьгум эз быр, но воддза дорысь этшаджык. Таво виччысьöны жö тайö котырöс.

Кулöмдiнса администрация мöдöд во öти и сiйö местаын резйö «Агрокиллер» сорасöн. Кольöм воын пызйöминас коръясыс вижöдiсны, да азьгумыс эз быдмы да эз дзоридзав, эз петны и выльяс. Тайö сорасöн водзсасясны и локтан воын. Бур, мый и сиктса олысьяс босьтчисны «тышкасьны». Таво нöшта куимöн ас окотаöн вöзйысисны ытшкыны йöзаинын. Овмöдчöминса администрацияöн веськöдлысь В.П.Игнатов аттьöалö водзмöстчысьясöс.

Ручын таво медводдзаысь виччысьöны «ДезКоми» котырöс. 2 гектар вылысь кутасны резны химияöн, та вылö урчитiсны 30 гöгöр сюрс шайт. Администрация корлывлö и уджтöмалысьясöс. Сиктсаяс ытшкöны асланыс йöрысь да, эм кö, орчча овтöм керкаяс дорысь.

Мысын йöз ытшкöны горт дорсьыныс да матыссаинö петöмъясöс. Эновтöм картупель муяс вылын быдмö вель нин ёна. Лэччысьны кö, разаласпаськалас водзö.

Пожöг вожын азьгум сярвидзö сиктъяс костын туй пöлöн. Улыс Ярашъю да Ярашъюын совхозыд эз вöв, да сэтчöдз эз на во. Великопольеын уна ыб вылын. Малеын кутiсны нин пырны керка йöръясö. Сиктсаяс водзсасьöны, дерт, сыкöд, но дзикöдз бырöдны эз на артмы. Ядöн да химияöн резйыны сиктъяс гöгöр овмöдчöминса юралысьяс век жö гижисны шыöдчöм «ДезКоми» котырö.

Дереваннöйын ньöти дорысь тайö быдмöгыд эм жö. Сыкöд водзсасьны кольöм нэмся 90-öд воясын на заводитiс сиктса водзмöстчысь ань Т.Н.Удоратина. Быд паныдасьысь мортлы казьтылiс, мый колö керыштны керка дорысь либö туй пöлöн быдмысь азьгум. Мöд ног паськалас да тыртас став сиктсö. Йöз кывзысисны, ытшкисны быд во. Талун повзьöдчысь быдмöг олан керкаяс дорысь он аддзы. Но мытшöдыс колис на. Сикт шöрсянь кывтыдö мунiгöн, буретш кытчö совхоз дырйи 80-öд воясын кöдзлiсны азьгум, талун быдмöны пуяс джуджтаöдз.

Сьöмöн сьöкыда бергöдчöмöн оз быд овмöдчöминса администрация вермы тыр-бура водзсасьны талун миянлы ковтöм нин быдмöгкöд. Колö водзмöстчыны, босьтчыны тышкасьны ставнымлы.
Татьяна Чувьюрова.