Кольöм воын районын олысьяс ылöдчысьяслы сетісны 9 миллионысь унджык шайт. Сотöвöй йитöд, мобильнöй телефонъяс да интернет пыр воддза воын серти мыж вöчöм содiс 5,7 процентöн.

Медся ёна шедöны налькйö, кор телефонö тöдтöм йöзсянь воö юöр, шуам тiян пыдди кодкö кöсйö босьтны кредит, да мед сьöмыд оз вош, колö вуджöдны мöд тшöт вылö, ыстасны код да корöны висьтавны налы. Тшöтш вöзйöны нажöвитчыны биржаяс вылын, мед сöвмис кутшöмкö котыр, корöны пуктыны сьöм.

Выль во водзвылын полицияö шыöдчис öти сиктын олысь ань, мый сійöс пöръялiсны. Та дырйи олысьыс ачыс аддзис социальнöй везйысь «гадайтчысьöс», юöртiс сылы, мый 2025–öд вося январын кöсйö ньöбны патера да шыöдчис корöмöн «видзöдлыны», артмасö ньöбны эмбурсö. Та вылö «гадайтчысьыд» вочавидзис, мый оз артмы, сы вöсна мый нывбабатö вомдзалiсны, да сiйöс босьтöм вылö ыстысьöмöн некымын мынтысьöмöн шыöдчысьлысь гусяліс 53 сюрс шайт. Водзö быд мынтысигöн ань гöгöр «чöртыс» лоліс унджык и унджык, да и ыстöм сьöмыс эз тырмы ритуалсö вöчöм вылö.

Мыж вöчöмö кыскöны и тыр арлыдтöмъясöс. 14 арöссянь велöдчысьяс, кодъяслы бать-мамныс лöсьöдiсны банкса картаяс, аддзöны нажöтка йылысь юöръяс. Нажöвитчöмыс артмö тöдтöм мортсянь банкса карта вылö сьöм босьтöмöн да мöд тöдтöм мортлöн банкса карта вылö водзö вуджöдöмöн. Быд вуджöдöмысь тыр арлыдтöм босьтö урчитöм процент. Таысь кындзи, нывзон вузалöны мессенджеръясын ассьыныс аккаунтъяссö тöдтöм йöзлы, и бöрынджык тайö аккаунтъясöн вöдитчöны миян странаын олысьясöс ылöдлöм могысь.

2025–öд во пансьöмсянь полицияö шыöдчисны нин, кодъяс смс-юöръясысь кодъяссö сетiсны тöдтöм йöзлы.

Нöшта öтчыдысь гöгöрвоöда районса олысьясöс. Лоöй сюсьöн, эн вочавидзöй тöдтöм номеръясысь телефон пыр звöнитöмъяс вылö, эн висьталöй тöдтöм йöзлы ассьыд юöръястö, эн юöртöй смс-юöръясын воысь кодъястö, эн юöртöй банкса картаяслысь да на вылын сьöм колясъяслысь мыччöдъяссö, донъялöмöн видзöдöй тöдтöм мортсянь юöр вылö. Эн ылалöй кокни да öдйö нажöвитчан вöзйöмъяс вылö. Мöвпыштöй, öтуввез пыр тöвар, а сідзжö услугаяс закажитігöн, торйöн нин корöны кö водзвыв мынтысьны да вöзйöны ыджыд скидка. Лоöй сюсьджыкöн телефон пыр бöбйöдлысьясысь.

Кулöмдін районса полицияын уджалысьяс татшöм мыж вöчöмысь öлöдöм могысь быд вежон пыр кытшовтöны олан керкаяс. Ми зілям воöдчыны быдöнöдз да аслыным висьтавны мошенникъяслöн ылöдчан ногъяс да сикасъяс йылысь.
Светлана Панюкова,
пытшкöсса делöяс министерстволöн районса юкöнöн веськöдлысьöс вежысь, туясян юкöнöн веськöдлысь, юстицияса майор.