Республикалы сё во тыригкежлö январ 11-öд лунсянь февраль 5-öд лунöдз онлайнын мунiс «Отечество — Земля Коми» туристалысьяслöн да ас му туялысьяслöн республикаса конференция. 17 кар-районысь пырöдчис 132 велöдчысь да 109 велöдысь. Вермысьяс лыдын лоисны миян районысь Ручса школаын 11-öд классын велöдчысьяс Таисия Удоратина да Виктория Абдуразакова.

Мария Андреевна Нестерова юрнуöдöмöн Таисия тöдмöдiс война кадö Дереваннöйын ыджыд удж бергöдысь Александра Павловна Чувьюровалöн олан туйöн. Тайö аньыс 1931-öд восянь уджалiс «Октябрьская победа» колхозын градвыв пуктас вöдитан бригадаын. Медся сьöкыд кадас, 1942-öд воын, индiсны колхозса председательöн. 1950-öд воын бöрйисны Жданов нима колхозöн веськöдлысьöн, 1952-öдын — сиктсöветса председательöн. Бöрйылiсны СССР-са да Коми АССР-лöн Верховнöй Сöветса депутатöн. Корлiсны Москваö кыпыд гаж вылö, кöнi ыдждöдлiсны И.В.Сталинöс 70 арöс тырöмöн. Бур уджсö пасйисны «Знак Почёта» орденöн да уна медальöн. Таисия петкöдчис «Ас мулöн кольöм вужъяс» юкöнын, да сылысь уджсö донъялiсны медвылö.
Виктория петкöдчис «Война кадö республикалöн олöм. Мыжтöг мыждöмаяс» юкöнын. Конкурс кежлö дасьтысигöн сёрнитiс война вылö усьöм Изосим Иванович Есев салдатлöн матыссаяскöд, кодъяс ветлiсны тыш мунанiнö. Мария Андреевнакöд юöръяс корсисны архивысь. Викториялöн уджыс босьтiс коймöд места. Чолöмалам Мария Андреевнаöс да сылысь велöдчысьясöс ыджыд вермöмöн!
Татьяна Чувьюрова.
Снимокъяс öтуввезйысь.