Босьтны документъяс кокниа да öдйö

[ A+ ] /[ A- ]

smart


2012-öд вося декабрын Ухтаын, Сосногорскын да Усинскын воссис унаторйöн могмöдан медводдза куим шöрин, кöнi сэтчöс олысьяс вермисны босьтны уна сикас услуга дзик öтилаысь, позьö шуны, «öти öшиньысь». Талун республикаын уджалö «Менам документъяслöн» 93 шöрин да юкöн, тшöтш и бизнесöс государственнöй услугаясöн могмöдысьяс.
Кулöмдiнын унаторйöн могмöдан шöрин воссис 2014-öд вося декабр 31-öд лунö. Районса олысьяс öдйö казялiсны тайö котырлöн уджлысь бурсö. Медводдза кадö йöз волывлiсны пенсия вылö петöм водзын корсьны архивса справкаяс, а сiдзжö мед-ым босьтны стрöитчöм вылö тшöктöм. Шöринö волывлысь йöзлöн лыдкöд тшöтш вочасöн содiс и услугаяслöн лыд.
Талун «Менам документъяс» шöринö Кулöмдiн районса олысьяс локтöны босьтны да вежны паспорт, пропишитчыны, пенсионеръяс — сетны документъяс, медым вештiсны шойччанiнö ветлöмысь туй, челядьöс чужтысь аньяс — босьтны Россияса да регионса мам капитал, либö пасйысьны кыдзи судзсьытöма олысь семья да босьтны субсидия вылö колана документъяс. Зэв унаöн шыöдчöны керка либö патера да мукöд стрöйба вылö право кузя документъясла, сувтöдны кадастра учёт вылö стрöйба, тöдмавны ЕГРН-ысь (стрöйбаяслöн öтувъя государственнöй реестрысь) юöр. Тулыс-арнас тшöкыда пыравлöны вöралысьяс, медым босьтны вöрса пöтка кыйöм вылö тшöктöм. Öнi уналаын корöны справка, мый мортöс эз мыждывлыны либö мый сiйö оз сулав учёт вылын нарколог дорын дурмöдчанторöн пагöдчöмысь. Татшöм справкаяс тшöтш вöчöны «Менам документъяс» шöрин пыр. Торйöн казьтышта асшöр уджалысьяслы услугаяс сетöм йылысь. Шöринын позьö пасйысьны асшöр уджö босьтчысьяслы да крестьянин овмöс кутысьяслы. Налы сідзжö оз ков ветлыны карö, медым сетны банкö уджйöзалöм кузя шыöдчöм да нöшта мукöд уна могöн. Районса ичöт бизнес став тайö услугасö вермас босьтны Кулöмдiнын.
Йöзлы ыджыд бурторйöн лоис и сiйö, мый морт öтпырйö вермас локны некымын могöн да став кузяыс босьтны колана документъяс. Шуам, кагаöс пропишитiгмоз аньлöн эм позянлун сетны мам капиталлöн сертификат босьтöм да пособие индöм вылö шыöдчöм. Сідзжö шöринса специалистъяс отсалöны пасйысьны Государственнöй услугаяслöн портал вылын.
Кулöмдінын «Менам документъяс» шöрин меститчö районса администрациялöн керкаын. Талун тані уджалö нёль специалист: старшöй эксперт Ирина Васильевна Холопова, экспертъяс Нина Васильевна Кузнецова да Наталья Олеговна Логинова, документъяс лöсьöдысь-дасьтысь Валентина Дмитриевна Мальцева. Ставныс найö — кывкутысь, ассьыныс удж бура тöдысь да вöчысь, ыджыд сяма специалистъяс. Шöринö волысьяс тöдöны нин: сет налы аслад мог кузя кöть кутшöм юалöм — вочавидзасны дзик быдтор вылö. Шаньöсь, вежавидзысьöсь, сюсьöсь, уджнысö вöчöны нюмсорöн, кыпыд сьöлöмöн. Гöгöрвоана — тайö налöн збыльысь радейтана удж. Сиктсаяслы нöшта бур, мый нывъяс сёрнитöны комиöн.
«Менам документъяс» шöринлöн юкöнъяс эмöсь и Пожöгын, Помöсдінын да Югыдъягын, та вöсна сэтчöс вожса олысьяслы оз ков быд пöрйö чепöс-йыны юрсиктö: шыöдчöм примитасны места вылын, татысь жö кад мысти позяс босьтны воöм дась документъяс. Пожöгын уджалö Валентина Александровна Третьякова, Помöсдінын — Наталия Петровна Попова, Югыдъягын — Оксана Анатольевна Калитовская. Ёна колöны уджалысьяс Зимстанö да Тимшерö. Сэтчö öні ветлывлöны Ку-лöмдінса шöринысь специалистъяс.
Со кыдзи донъяліс «Менам документъяс» шöринлысь удж Зимстана олысь Нина Павловна Лодыгина:

  • Ме шыöдчылі «Менам документъяс» шöринö некымынысь. Лыддя, мый татшöм шöринсö вось-тöмыс — медся ыджыд буртор выль пыртöмторъяс пиын, сы вöсна мый öтилаын збыльысь могмöдöны зэв унаторйöн, и ставыс дон босьттöг. Шöрин-ын зільöны ыджыд сяма специалистъяс. Меным чайтсьö, мый найö тöдöны дзик ставсö: мый йылысь кöть ог юав — быдтор висьталöны-гöгöрвоöдöны спутьысь-спуть. Тайö менö зэв ёна шензьöдіс. Ме век локта шöринö кыпыд руöн: нывъяс зэв шаньöсь, вежавидзысьöсь. Пырöмсянь вочаалöны небыдик нюмöн, сёрнитöны шаня, оз, бара-й, дöзмыны уна сикас юалöмысь, ставсö гöгöрвоöдасны. Ме серти, тайö медся бур котыр, кодкöд ме коркö паныдасьлі аслам олöмын. Аттьö нывъяслы!
    Лидия Липина,
    «Менам документъяс»
    районса юкöнöн веськöдлысь.
    Гижысьлöн снимок вылын: (шуйгавывсянь)
    В.Д.Мальцева, Н.В.Кузнецова, Н.О.Логинова, И.В.Холопова.

Комментарии:

Добавить комментарий

Свежий выпуск: за 26 июня