2018-öд вося гожöмын Санкт-Петербургын ордйысисны, кодi медöдйö тэчас Рубиклысь кубик. 30 петкöдчысь лыдын вöлi и Донысь Илья Антонов, лоис коймöдöн, тэчис 13 секундаöн. 
Ильялы 13 арöс, велöдчö Кулöмдiнын шöр школаса сизимöд классын. 2017-öд вося тулысын сiйö аддзис социокультурнöй шöринысь Рубиклысь кубиксö, корис шöринöн веськöдлысь Артур Гарновлысь ворсыштны да тайö лунсяньыс ылалiс тайö чачанас. Гортас видзöдiс интернет пыр да öтарö велöдчис, кыдзи тэчны кубиксö. 
Кык тöлысь мысти кутiс артмыны. Синмыс нимкодьысла öзйис. Сэксянь кутiс корсьны да судзöдны интернетысь быдпöлöс кубик. Вöлöмкö, сэтшöмыс сюрс кымын. Тэчигас вомгорулас век мыйкö шуалö. Вöлöмкö, чачалöн быд рöмлы сiйö пуктö кутшöмкö шыпас, и мед лöсялiс кубиклöн став рöмыс, лöсьöдö кывъяс. Шемöсмöдiс дзикöдз, кор тупкис синсö дöраöн да корсис рöмъяссö некымын секундаöн. Республикаын сiйö кужö вöчны тайöс дзик öтнас. Велöдö ёртъяссö. Санкт-Петербургсянь локтiгöн поездын кык тöдтöм мортöс велöдiс вöчны час-мöдöн. Зонлöн висьталöм серти, мед велавны, колö лоны ыджыд кутöда мортöн, пуктöм мог быть пöртны олöмö. 
Санкт-Петербургöдз Илья ветлiс ордйысьны Сыктывкарö да лоис мöдöн. Ас кодьыс жö ныв-зонъясöс аддзис интернетысь. Сёрнитöны асланыс вермöмъяс йылысь, велöдöны öта-мöднысö. 
Илья зэв вежöра да вежавидзысь морт, радейтö иславны скейтбордöн да гироскутерöн. Пуктiс мог велöдчыны гитара вылын. Зонлöн куим вокыс петкöдлöны пример. Медся ыджыд Андрей, олö Кулöмдiнын да ворсö футболöн. Шöркост Кирилл велöдчö Санкт-Петербургын баскетбол кузя тренерö. А Максим велöдчö Сыктывкарса университетын геолого-биологическöй факультет вылын. Бать-мамыс Донын пыдди пуктана йöз. 
Öнi зон дасьтысьö ордйысьöмъяс кежлö, кодъяс лоöны регыд Кулöмдiнса школаын. Пуктiс мог чукöртны кубик 10 секундаöн. Тайö вайö Ильялы сöмын бур, шуö, мый вежсис велöдчöм дорö видзöдлас. 
Гижöд да снимок Галина КЛЮЖЕВАЛÖН.