И бурдöдысь, и майшöг лöньöдысь

Да, буретш тадзи позьö донъявны тэрыб отсöг сетан юкöнын уджалысьясöс. Нёрпалысьяслы отсöг сетöм да бурдöдöм кындзи висьöмъястö зэв бура кокньöдöны-лöньöдöны мелi киясöн, шоныд да эскöдана кывъясöн.
Мария Николаевна Игнатова тэрыб отсöг сетан юкöнын 2018-öд вося ноябрсянь. Ачыс Ручса. 2012-öд воын Сыктывкарса медколледж помалöм бöрын пырöдчис «Земский доктор» программаö, мунiс уджавны Мысса фельдшерско-акушерскöй пунктö. Тайö сиктын и аддзис ассьыс шудсö, олöмсö öти гöрöдö йитiс Александр Васильевичкöд. Том бурдöдысьöс сэсся корисны тэрыб отсöг сетан юкöнö, да эз бöрыньт. Семьянас вуджисны юрсиктö, ньöбисны керка. Верöсыс пемöсъясöс бурдöдысь, да удж сюрис и сылы. Талун öти кагаыс ве-лöдчö медводдза классын, мöдыс котралö садйö.

• Сиктад да юрсиктын тэрыб отсöг сетанiнын фельдшерыдлöн уджыс öткодь. Кадöн он артась, лун и вой вöлi петан висьысьяс дорö. Танi туйдысь-велöдысьнас вöлi ыджыд сяма фельдшер Татьяна Семёновна Напалкова. Водзтi кö нёрпалысьяс звöнитлiсны-шыöдчылiсны веськыда миян дорö либö висьысьясöс примитанiнö, мöд ног кö приёмнöй покойö, со таво апрельсянь тэрыб отсöг сетан службалöн 103 номерö. Миянöс могмöдiсны планшетöн, сэтчö и воö, кытчö колö мунны, юöрыс. Висьысьясöс примитанiнö позьö жö на звöнитны. Тшöкыда овлö, торйöн кутшöмкö висьöм ыджыдалiгöн, мый ветлiм öти висьысь дорö, эг на воöй уджаланiнöдз — бара на корöны мöдлаö. Позьö шуны, лунтыр туйынöсь. Звöнитöны оз сöмын висьысьяс. Öтчыд шыöдчис öти морт, пöлöй пö кулiс да дышöдiс овнысö. Та дырйи уджалан психолог моз. Ёна колiс сёрнитны-лöньöдны да и гöгöрвоöдны коронавирус босьтчигöн повзьöм-весьöпöрöм йöзöс, — сёрнитiс Мария Николаевна.
  Тшöкыда петалöны и районö. Ытва дырйи висьöмöн топöдысьясöс ю дорöдз вайöны сикт-посёлокса фельдшеръяс, таладорас вочаалöны нин миян тэрыб отсöг сетан юкöнсаяс. Уджалысьяслöн отпускалан кадö шойччыны вичмö этша кад. Но оз элясь том специалист, öд дзолясянь кöсйис лоны бурдöдысьöн, отсавны йöзлы, ачыс бöрйис тайö туйсö.
  Марина Дадашова.
  Гижысьлöн снимок вылын Мария Николаевна Игнатова.