Айму дорйысь

[ A+ ] /[ A- ]


Аддзысьлi Иван Третьяковкöд, кодi коймöд во нин велöдчö Санкт-Петербургын. Гортö волыны позьö кыкысь вонас. Со и öнi, кыдз и кольöм воын Андрей Васильевич Хрулёв нима академияса курсант Иван Третьяковöс лэдзисны водзджык мукöдысь. Пуктiсны мог — тöдмöдны да ышöдны сы кодь жö войвывса зонъясöс повтöг пырны велöдчыны, медым кык во да дас тöлысь бöрын босьтны кык диплом, öтиыс — военнöй, мöдыс — гражданскöй. Военнöйыс — нуöм-вайöм, котыртöм да автомобильнöй транспортöн веськöдлöм, гражданскöйыс — логистика, сiдзкö груз нуан заказ котыртöм, да сiйöс места вылöдз вайöмысь кывкутöм.
Сёрнитыштiм, кыдзи колис кык велöдчан воыс. Колö пасйины, кольöм воын Ванякöд ми сöмын на тöдмасим. Сiйö вöлi верстяммытöм на зонкаöн, аскиа лунсö тыр-бура гöгöрвотöмöн. А со öнi паныдалiс менö статя, вына том мужичöй, кодi тöдö нин ассьыс Аймулы коланлунсö да удж вöсна кывкутöмсö. Со мыйöн юксис зон.

  • Мöд курсын заводитiсны логистикасö велöдны, зэв интереснöй урокъясыс. Тöдмалам, кытi туйыс сувтас донтöмджык, дженьыдджык да выгоднöйджык. Тöдны колö и компьютерын торъя программа, кодi топыда йитчö тайö уджсикасыскöд.
    Оласног йылысь кö сёрнитны, казармаö вой кежлö кольöны öти дежуритысь да куим дневальнöй — наряд. Найö видзöдöны пöрадок да лун колляланног бöрся. Ставныс миян кодь жö курсантъяс. Наысь öтдор казармаö войнас кольччö öти офицер. Асылыс заводитчö квайт часын. Этаж вылын дневальнöй гораа шуö «Рота подъём», сiдзкö колö чеччыны. Пасьтавны спортöн занимайтчан кöлуй да петны зарядка вöчны ывлаö (ёна кöдзыд кö, овлö, гуляйтам сöстöм сынöд вылын). Та бöрын пырам да комын минутöн асьнымöс вайöдам пöрадокö: мыссям, пасьтасям военнöй формаö, босьтам тетрадь, ручка, кодöс сюям планшетö. Сизим час комын минутын петам ывлаö, сувталам радö, гораа сьылöм да барабанöн ворсiгтыр мунам сёйны. Вердöны чöскыда, овлö быдсяма номсасянторйыс, весиг «шведскöй стол», но ёна унасö босьтныс оз жö позь, медым тырмас ставныслы. Командиръяс сюся кыйöдöны ставныс-ö сёйисны, мед некод эз мун тшыг кынöмöн босьтны тöдöмлунъяс. Нуръясьöм бöрын кубрикса (тадзи шуöны казармаын олан жыр) дежурнöйяс мунöны мыськавны джодж, лöсьöдны öшалысь кичышкöдъяс да крöватьяс, босьтöны бус, да пелька тэчöны противогазъяс. Тайö ставсö велöдöны медводдза воö том боецъяслöн курсын. А мукöдыс петöны асъя видзöдöм вылö (развод), бара жö сувталöны радöн. Сержант видзöдалö, ставныс-ö дасьöсь мунны велöдчыны, лöсьыда-ö шырöма-бритöма кантикъяс, гладитöма-ö форма. Курсантъяс ставсö вöчам асьным: мыськалам да гладитам кöлуй, видзöдам асланым пельклун бöрся. Тöвнас асъя видзöдöм вылын весалам лым. Кöкъямыс час комын минутын бара стрöитчам да мунам велöдчан корпусö. Луннас куим пара урок, ставыс кык часöдз. Та бöрын мунам пажнайтны. Кык чассянь куим да джынйöдз — прöст кад, но мунны некытчö оз позь. Водзö петам лунся видзöдöм (развод) вылö. Батальонса командир курсантъяслы висьталö лунся лоöмторъяс йылысь, да мöдöдчам велöдчан корпусö вöчны урокъяс вылын гортö сетöм удж. Рытнас сизим час да джынйын ужнайтам, а сэсся узьны водан сигналöдз — дас час рытöдз эм прöст кад. Сэки позьö звöнитны кнопкаа телефонöн гортсаяслы, ёртъясыдкöд юны кузь пызан сайын чай, видзöдны телевизор либö ворсны приставкаöн.
    Быд велöдчысьлы урчитöма кутшöмкö öружие. Шуам, менам автомат. Кодъяслöн кö, гранатомёт да пулемъёт. Быд выльлунö ми резьöдлам, весалам-мавталам да выльысь тэчам найöс. Быдöн кывкутö öружиелöн уджаланногысь. 17 арöсын велöдчи водительö, но училищеын правоöс босьтiсны. Миянлы кар да сиктъясын руль сайын ветлöдлыны оз позь, сэтшöм правилöяс. Сетасны сöмын велöдчöм бöрын. Велöдчи и «Камаз»-öн ветлыны. Урокъяс вылын велöдам и быдсяма грузъяс новлöдланногсö, весиг öпаснöйяс. Мыйлакö Комисьыс зонкаяс этшаöн локтöны велöдчыны миян дорö. А велöдчынысö зэв интереснö. Ветлывлам каръястi, тöдмалам и гражданскöй олöмысь логистика профессия йылысь, и быдсяма öружиенас вöдитчыны велöдчам. Новлан военнöй паськöм суббöтаö мыськалам. Вöскресенньöö новлам полевöй кöлуй, гортса дöрöм-гач пасьтавны оз позь. Медводдза воö том боецъяслöн курс мунiс Приветнинскöй карын. Быд лун котравлiм Финскöй залив дортi. Таво, кыдз и кольöм воын, тöвся каникулъяс вылö лэдзисны водзджык, да бать-мамлы эг юöрт, мый локта. Другысь вои да, гортсаяс вöлiны зэв радöсь.
    Кора зонъясöс локны велöдчыны миян академияö. Босьтöны сöмын зонъясöс. Экзамен дырйи колö кад вылö котöртны 100 да 3000 метра, киöн кужны ассьтö лэптавны (подтягивание) да эм нöшта психология кузя тэстъяс. Позьö шыöдчыны и ме дорö редакция пыр, вочавидза юалöмъяс выланыд, — висьталiс Пожöгса зон, коймöд во велöдчысь курсант Иван Анатольевич Третьяков.
    Татьяна Чувьюрова.
    Снимок Иван Третьяковлöн архивысь.

Комментарии:

Добавить комментарий

Свежий выпуск: 28 марта

Осторожно — мошенники!