Служитiс спецназын

Сынöдса десант войска — тайö медбур войска. Сэтчö кöсйöны веськавны унаöн, но оз на быдöнлöн артмы. Кулöмдiнысь Вольф Васильевич Ульныровлы мойвиис. Служитiс Псковын десантникъяслöн спецназын торъя тöдчанлуна мöдöд бригадаын. А вöзйисны районса военкоматын. Армияö мунiгкежлö бурдöдчысьяслöн кывкöртöд серти бур вöлi дзоньвидзалуныс. Кутчысис дзоньвидза оласногö, ёртасис спорткöд, урокъяс бöрын тэрмасьлiс спортзалö, ворсiс волейболысь, баскетболысь, котралiс лыжиöн, да и гортас вын-эбöс песiс турник вылын.

— Районысь вöлi öтнам, сэсся Княжпогостын öтувтiсны республикаысь воöмаяскöд, но найöс нуисны водзö, а ме веськалi Псковö, сöмын гоз-мöд тöлысь мысти пара мортöс вайисны республикаысь. Медводдза лунсяньыс велöдiсны овны, служитны öтув да уставö кутчысьöмöн. Ме вöлi водительöн, новлöдлi салдатъясöс парашютöн чеччаланiнö, нёльысь чеччыштлi и ачым. Тöдмасим парашютлöн тэчасногнас, кыдзи веськöдлыны сыöн муö лэччигöн, велöдiсны тренажёръяс вылын. Самолётын инструктор инмöдчас пельпомад, шуас: «Пошёл», и чеччыштан. Медводз сынöдö воськовтöны сьöкыдджыкъяс, а ме на бöрын нин, — казьтылiс служитан кадсö Вольф Васильевич.

Ёна котралiсны, чеччалiсны, лэпталiсны гираяс, лыйсисны. Десантникъяслы котыртлiсны быдсяма ордйысьöмъяс. «Вöрöгöс» босьтлiсны кытшö, отсöг вылö рация пыр корисны штурмöн босьтысь десантникъясöс. Тадзи зонъяс петкöдлiсны быд здук Айму видзны дасьлун.

Победалöн лунö парад вылö бригадасö дзоньнас нулiсны Великие Луки карö. Сыöдз февральсянь быд лун квайт час чöж велöдiсны восьлавны стройöн сiдз шусяна кöрöбкаын, мича визьöн, юр лэптöмöн да бергöдöмöн.

2011-öд восянь армияысь бергöдчöмсянь Вольф Васильевич уджалö шöр бурдöдчанiнын флюорография вöчан оборудование новлöдлан машинаса водительöн.
Марина Дадашова.
Снимок Вольф Ульныровлöн чукöртöмысь.