Ыджыд арлыд вылö видзöдтöг, Зимстанысь Елизавета Тимоновна Чаланова зэв на тэрыб вöраса, варов да шмоньлив, пыр на бергöдчö мöскöн.

Дерт, отсасьö Василий пиыс, кодi олö сыкöд. Некор эз öтдортчыв сьöкыд уджысь, тöдчис велöдöмыс батьыслöн, кодi Фроловскын олiгöн кутiс ён овмöс. 1942 воын, кор муртса на тырис 16 арöс, уджалiс Сьöдкöджын да Вадбöжын пуръясянiнын, кылöдiс вöр. Уджалiсны айловъяс пыдди, кодъясöс кызвыннас нуисны фронт вылö. Сёрöнджык увйысис Чипсисьса улыс складын. Сiйöс бырöдöм бöрын семьянас вуджисны овны Зимстанö, кöнi увйысис Пруптса леспромхозлöн улыс складын. Кер дорын уна вося бур уджысь вичмöдiсны «Уджвывса ветеран» ним.

Июнь 8 лунö Елизавета Тимоновналы тырис 90 арöс. Сiйöс чолöмалiсны да сетiсны Россияса президентлысь чолöмалан гижöд да козин олöмаяслöн райсöветöн веськöдлысь Г.А.Кравченко да республикаса юралысьлöн районса примитанiнöн веськöдлысь А.А.Кузнецова. Чолöмалiсны и олöмаяслöн Зимстанса котырöн веськöдлысь Л.Б.Конакова, рöдвуж да тöдсаяс. Сиисны дыр на овны да гажöдны шмонитана сёрнинас, ышöдны бур олöм вылö челядьсö да внук-внучкаяссö.
Галина НЕСТЕРОВА.
Снимок Кирилл Поповлöн.