Кулöмдiнса шöр бурдöдчанiнын öнi уджалö дыр виччысяна, зэв колана специалист ― врач-онколог. Ракöн висьысьяслы, кодъяслöн лыдыс районын содö воысь воö, комылiс лэччывлыны онколог дорö карö. Öнi юрсиктын эм асланым врач. Светлана Васильевна Книгницкая Керчомъяысь. Помалiс Перымса медицина институт. Сизим во уджалiс Сыктывкарын пытшкöсса делöяс министерстволöн поликлиникаын хирургöн да ветеранъяслöн госпитальын поликлиникаöн веськöдлысьöн да хирургöн. Сэсся содтöд велöдчис Кировса государственнöй медицина академиялöн карса филиалын онкологö. Висьталö, мый уджыс тöдса нин: Перымын велöдчигöн уджыштiс ракöн висьысьясöс бурдöданiнын. Сэсянь пыр мöвпалiс босьтны тайö специальносьтсö. Кöсйöмыс збыльмис. Локтiс уджавны ас районö. Юрсиктын уджыштiс нин, отпуск кадö вежлывлiс хирургöс. Öнi уджалö хирургöн да онкологöн. Дерт, сьöкыд кык пыддитö, луннас сы дорö волö матö 80-100 морт, но нинöм пö он вöч, вежысьыс абу. Онкологлöн уджыс сьöкыд: бурдöдöм кындзи, колö кужны сибöдчыны быдöн дорö, ышöдны-бурöдны. Но уджыс сьöлöм сертиыс.