Кулöмдiнысь Александр Николаевич Иевлевöс Чернобыльса атомнöй электростанция вылын лоöм неминуча бырöдны нуисны 1989 воын. Сэки «Строитель» котыр, кöнi сiйö уджалiс, вöчасис Пожöгдiнса культура керкаын. Чукöстiсны военкоматсянь. Эз юавны, кöсйö ли оз. Эз босьтны тöдвылö, мый 31 арöса айлов гöтырыскöд быдтiс кык дзоля нылöс.
Олiсны Гомель обласьтса Сувиды сиктын Чернобыльсянь 15 километр ылнаын. Пусянiнö, пывсянö, олан палаткаясö ыджыд машинаöн юкмöсысь ваялiс ва. Кывкутiс мöд машина вöсна, но вит да джын тöлысьöн, кор Александр Николаевич вöлi сэнi, сiйö эз ковмыв.

— Миянкöд тшöтш вöлi республикаысь онкология бурдöдчанiнöн веськöдлысь Леонид Витальевич Башмаков, кодi быд лун видзöдiс уджалысьяслöн дзоньвидзалун бöрся. Сыкöд ми бöрыннас ёртасим, пыр корис бурдöдчанiнö, мед гöгöрбок видзöдлыны дзоньвидзалунöс, да эг и ветлы. Радиация уналысь босьтiс дзоньвидзалунсö да виис. Корсюрö босьтла киö снимокъяса альбом да казьтывла найöс, кодъяс абу нин ловъяöсь, — висьталiс А.Н.Иевлев.
Гижöд да снимок МаринаДадашовалöн.