Вылыс Эжва ёна нималö енбиа йöзöн. Мича вöр-ваыс, буракö, отсалö мортыслы сöвмыны быд боксянь. Скöрöдумса библиотекаын том серпасасьысь Дарина Колеговалöн уджъясысь лöсьöдiм «Мичлуныс кытшалö миянöс» выставка. Öткымын серпас и эм, а синтö ылöдлö дыр кежлö. Быд серпас сибöдö ас дорас, вöзйö видзöдлыны быд юкöн. Быд видзöдысьлöн чужö юалöм, кытысь татшöм енбиалуныс серпасавнысö?
Дарина чужис Сыктыв районса Куратов сиктын. Вит арöссянь олö Кулöмдін районса Мöдлапöв грездын. Öні уджалö садикын воспитательöн.

 Рисуйтчыны босьтчис садиксяньыс на, а школаын дас öти во велöдчигчöж ветлöдлiс серпасасьысьяслöн кружокö.
Прöст кадö рисуйтö портрет. А велöдчöма ачыс. Öні видлö асьсö мöд нырвизьын — аддзыны да петкöдлыны вöр-ваыслысь аслыспöлöс мичлунсö.

 Нывлы сьöлöм вылас воöны татшöм художникъяс, кыдз А.И. Куинджи, И.К.Айвазовский, К.П.Брюллов да В.М.Васнецов. Торйöн нин Виктор Васнецов, кыдз роч мифология да славяна фольклор тöдчöдысь художник.
Нöшта ышöдö öнія кадся том художник Azyza. Сылысь зэв уна мöвп позьö бöрйыны аслад уджö. Azyzaлысь öти картинасö позьö видзöдны час чöж да нимкодясьны сылöн енбиалунлы, ёна шензьöдö сылöн видзöдласыс.

 Дарина сідзжö кыö макраме, снимайтчö. Ставас велöдчöма ачыс книгаяс да интернет серти. «Окота кö, позьö велöдчыны быдторйö», — висьталö Дарина.

 Юлия Королёва.

 Снимокъяс гижысьлöн.