Миян Жан Валентинович

Пожöгса школа помалi 44 во сайын, локтан воын велöдчанiнкöд янсöдчöмсянь лоас тшупöда пас. Олöм чöж казьтывла сэки школаса директор Жан Валентинович Сумароковöс. Вöлi зэв тöждысьысьöн, миянлы бать кодьöн, вывтi авъя да восьса мортöн, велöдысьöн и туйдысьöн.

Быдми да кöкъямыс классöдз велöдчи Вылыс Ярашъюса, помалi Пожöгса школа. Олiм интернатын, шойччан да каникулъяс кежлö тöвзьылiм гортö. Быд рыт водöм водзын интернатö волiс ачыс Жан Валентинович, пыравлiс быд жырйö, сёрнитiс, вöчимö гортса уджнымöс, ставöн-ö дасьöсь аскиа урокъяс кежлö, юавлiс, кыдзи олам.
Окота мöвпъясöн бергöдчывны сiйö кадас. Гожöм, июнь, экзаменъяс сдайтан кад. Троича лун, да экзамен бöрын вит-ö-квайтöн ветлiм Вомынбöжö öтлаын велöдчысь ныв дорö. Окота вöлi видзöдлыны, кыдзи сэнi пасйöны тайö лунсö. Сэки ю вомöн пос эз вöв, пыжöн вуджöдчыськöд сёрнитчим, мый матыстчас водзджык. 10 час рытын мед ми вöлiм нин интернатын. Водзджык жö и матыстчим ва дорö, а пыжыд абу. Ас кадö эз лок, да ми сёрмыштiм 10 минутöн. Пыр на син водзын, Жан Валентинович ветлöдлö нин интернатын, петкöдчыны полам, мый вöчны. Меным эськö позис кайны Шахсиктö ыджыд мам дорö. Но эг торйöдчы, мыжмим кö, колö кывкутны ставнымлы öткодя. Кайим кильчö вылö, сулалам, шыöдчим жö: «Жан Валентинович, сёрмыштiм, корам прöща. Позьö пырны?» А сiйö миянöс быттьö эз казяв, эз видзöд миянлань. Чöвлöнь, ок и яндзим вöлi. Гöгöрвоана, сiйö кывкутiс и миян олöм вöсна. А танi артмис, мый сiйöс пöръялiм. «Катя, ветлы менам пывсян дорö, сэнi быдмö зэв мича петшöр», — эз пинясь, эз горзы, шуис лöня. А керканыс вöлi орччöн. Июнь, буретш петшöр пуритiс-быдмис. «Кымынöс нö?» — горöдiс Катя. «Морт öтикаöн», — вочавидзис Жан Валентинович. Зэв öд шмонитысь вöлi. А ми чайтiм, мый збыль петшöралас, «велöдас» экзаменъяс дырйи кывкутана кадö ветлыны кытчö оз ков.

Мöд лунас экзамен бöрын ветлiм Пожöгдiнö. Сэтчö вуджны оз ков. Рытнас интернатö бергöдчим стöч дас час кежлö.
Математикаыд сетчис бура, классын матö ставöн вöлiм ёнöсь тайö предметсьыс. А алгебра да геометрия велöдiс буретш Жан Валентинович. Школа помалöм бöрын ныв чукöр мунiм Коми пединститутлöн физика да математика факультетö. Сэки сиктса коми школаясад велöдiсны öти, кокниджык, каръясад да мукöд, роч школаясад мöд программа серти. Да и физикаыд эзджык вöв сьöлöм серти. Öти кывйöн кö, ставöн бергöдчим бöр. Жан Валентинович менö босьтiс уджавны интернатö нянечкаöн. Матыстчö тулыс. «Но мыйнö, Санюк, мöвпыштлiн эн кытчö мунан велöдчыны?» — юалiс менсьым. Мися, ог и тöд. Аски пö лэчча Кулöмдiнö, пырала райфинса начальник Александр Николаевич Булышев дорö, менам пö сiйö зэв бур тöдса, кора тэныд направление, математикатö пö бура велöдiн, да мунан Перымса финансöвöй техникумö. Зэв пö бур техникум да профессия, некор он каитчы. Ме юр жуглi, мыйсяма татшöм техникумыс, финансöвöй кывсö эг на тöдлы да. И мунi, мекöд тшöтш велöдчисны Керчомъяысь Валентина Воробьёва да Помöсдiнысь Светлана Козлова, öнi кыкнанныс Поповаяс.

Диплома том специалистöн бергöдчи ас районö. Сэки лöсьыд вöлi, тэнö кö ыстiсны велöдчыны, лоас и удж. Том йöзтö быдлаö босьтiсны окотапырысь. Веськалi велöдан юкöнö, мöд ног кö РОНО-ö. Юкöнöн веськöдлысь Иван Тимофеевич Морохин пыртiс бухгалтерияö, со пö тэныд пызан, туйдысьнас лоас Екатерина Семёновна Напалкова. И тадзи вöлi быд уджаланiнын, том специалистъяслы уджö пырöдчыны отсасьлiсны, туйдiсны ыджыд сяма уджалысьяс. Öнiöдз аттьöала и Екатерина Семёновнаöс.

Велöдан юкöнын зiли кык во. Колiс ёна ветлыны командировкаясö, да вуджи «Сельхозхимия» котырö. Сэсся уджалi видз-му овмöс управлениеын, водзö госпромхозын. Сiйö тупкысис, да пыри «Белкомö», нимсö вежис да лоис «Флораöн». 1984-öд восянь пыр вöлi медшöр бухгалтерöн. Ставнас öти должносьтöн уджалi 41 во. И некор юрö эз пыравлы, мый колö петны мöдлаö, кажитчис бухгалтерлöн уджыс, кöть и медводдза кадас вöлiсны сьöкыдлунъяс. И пыр казьтывла Жан Валентиновичöс.

Школа помалöм да ас олöмö петöм бöрын öтлаын велöдчысьяскöд аддзысьлiгöн пыр ветлiм миян пыдди пуктана велöдысь да директор дорö гортöдзыс. Дина Николаевна гöтырыс веськöдлiс миян классöн. Вочаавлiсны зэв пöся, локтiгкежлö дасьтылiсны озыр пызан. Кöть Пожöгса школаын велöдчим кык во, но вöлi мый йылысь сёрнитны, мый казьтывлыны. Бытьысь юасьлiсны, кыдзи олам-вылам. Аттьöавлiсны, мый ог вунöдöй найöс, мый налöн öдзöс пыр восьса школа помалысьяслы. Чайта да, Жан Валентиновичöс миян моз жö сöмын бурöн казьтывлöны Пожöг вожса став олысьыс.
Александра Иванова.
Снимок «Парма горлöн» архивысь.