Совхозö пыдди — Чернобыльö

• Военкоматö корисны нопйöн, да мöвпалi, мый тшöтш и сэсянь котыртöны отсасьны совхозлы кöрым заптöмын, а юöртiсны Чернобыльö нуöм йылысь. 30 арöса вöлi, быдмисны нин ныла-пиа, да босьтiсны. Томджыкъястö да челядьтöмтö эз вöрöдны, — казьтылö Алексей Михайлович Уляшев.
  1987-öд вося август 6-öд лунö петiс туйö. Юркарса бурдöдчанiнын дзоньвидзалун видлалöм бöрын нуисны Челябинск обласьтса Златоустö, велöдiсны вöдитчыны приборъясöн, мерайтны радиация, радиация бус, кыдзи видзчысьны радиация кöвъялöмысь. Лоис химик-разведчикöн. Сентябр 16-öд лунö вöлi нин Чернобыльын. Сэтчö воöмаясöс юклiсны, Алексей Михайлович веськалiс Прибалтикаса военнöй кытшö. Сувтiсны Стечанка сиктö. Реакторöдз вöлi 8 киломерт. Кытчö мöдöдлiсны, сэтчö и мунлiсны, мерайтiсны радиация, гижалöмсö сетлiсны старшöй химиклы. Сiйö нин сэсся вöлi урчитö, кöнi да кымын час позьö уджавны рабочöйяслы.
  Алексей Михайлович сэнi вöлi 1987-öд вося сентябр 16-öд лунсянь ноябр 27-öд лунöдз. Реактор дорын уджалiгöн 12 лунöн босьтiс нин мортлы позяна радиациялысь доза. Сэсся дежуритiс видзöдан-лэдзалан пунктын, нулiсны мерайтны радиация посёлокъясö.
• Атомнöй электростанциясянь 30 километр гöгöрын некод нин эз ов. Миян часьт сулаланiнкöд орччöн вöлiны дзик выль скöт картаяс, либö эз на удитны пырны, либö ставсö петкöдiсны нин, — водзö сёрнитiс неминуча бырöдысь.
  Вердiсны-юктöдiсны зэв бура. Быд лун пывсисны, сетлiсны выль паськöм, важсö сотлiсны.
  Гортас бергöдчöмöн водзö уджалiс Кулöмдiнса леспромхозлöн Кужса лесопунктын трактористöн, кипомысь пöрöдлiс вöр, увйысьлiс. 20 во зiлис леспромхозын, 14 во — лесничестволöн Кужса юкöнын лесничöйöн. Шойччöг вылö петiс 2007-öд воын.
  Но гортас оз пукавсьы. Алексей Михайлович Чернобыльын вöвлöмаяслöн районса котырöн юрнуöдысьöс вежысь, 2018-öд восянь пырö олöмаяслöн Кебанъёльса котырö. Татьяна Васильевна гöтырыскöд кутчысьöны дзоньвидза оласногö, ветлöны подöн, котыркöд петкöдчöны ордйысьöмъясын, быдсикас нуöданторъясын. Нöшта на гозъя «Девчата» сьылан-йöктан котырынöсь, пырöдчöны гажъясö.
  Став висьöмыс вунлö, бордъясьлöны внук-внучкаяслöн волiгöн. Нина нывныс олö карын. Сiйö терапевт, кардиолог, вöчö УЗИ. Верöсыскöд быдтöны куим пиöс. Андрей пиыс Татьяна гöтырыскöд Кулöмдiнынöсь, зiльö лунвыв электрическöй сетьяслöн районса юкöнын. Налöн öти ныв.
• Ме том дырйи ёна ёртасьлi спорткöд, нимкодь, мый внукъяс ветлöны варччанiнö, ворсöны футболысь, внучка ворсiс шахматысь, сэсся бöрйис пауэрлифтинг. Быд гожöм волöны внукъяс, дзолясяньныс велöдi, да ставöн вотчам, кыям чери. Отсалiм пи-нывлы сувтны кок вылö, öнi найö миянöс кытшалöны тöждöн, — кывкöрталiс Алексей Михайлович.
  Марина Дадашова.
  Гижысьлöн снимок вылын Алексей Михайлович Уляшев.