Томöсь да зiльöсь

Кулöмдiнысь Виктор Анатольевич Лопырев Сыктывдiн районса Выльгортын мöд номера училищеын автомеханикö велöдчöм бöрын во зiлис чужан сиктын öти ас вылö уджалысь дорын. Но шуис велöдчыны водзö техник-механикö видз-му овмöс техникумын. Помавтöдзыс воöн водзджык босьтiсны армияö. Во служитiс Санкт-Петербург дорын зенитно-ракетнöй войскаын, а гортö воöм бöрын помалiс велöдчöмсö, кыпöдiс квалификациясö нёльöдсянь витöд разрядöдз. Уджавны локтiс воддза местаас. Ас нянь вылö петöм йылысь мöвпыс юрас волiс нин, содтöд тöдöмлунъяс босьтны пырис велöдчыны уджысь орöдчывтöг юркарса вöр институтö логистикö. Дипломсö дорйис автомобильнöй сервис кузя.
Велöдчигöн да öттшöтш уджалiгöн на Иван вокыскöд ньöбисны аслыныс кутшöмсюрö инструмент. А диплом босьтöм бöрын Виктор Анатольевич заводитiс уджавны ас вылас нин, восьтiс машинаяс дзоньталанiн. Вöлi сьöкыд, уджалöм вылö жырйыс эз вöв. Медводз сiйöс босьтлiсны кöртымö. А 2014-öд воын босьтчисны кыпöдны аслыныс стрöйба. 2017-öдын петiсны сэтчö. Тайö кадö жö районса администрациясянь ас вылö уджалысьясöс ышöдöм могысь вичмöдiсны 300 сюрс шайта грант. Сы вылö ньöбисны машина лэптан, пресс да мукöд поснитор.
Колö шуны, мый сиктсаяс Виктор да Иван Лопыревъясöс унаöн тöдiсны нин. Öнi машинаыд эм öд пöшти быдöнлöн, да тшöкыда лоö шыöдчывны мастерскöяд. А найö банкъясысь уджйöзалöмöн ньöжйöник паськöдчисны — ньöбисны содтöд коланаторъяс. Талун Виктор Анатольевичлöн станцияын позьö тöдмавны, кытi колö дзоньтавны «кöрт вöлыдлысь» да тырвыйö разь-ны аддзöм мытшöдсö. Татшöм том да водзмöстчысьяс саяс и эм аскиалуныс.
Ольга Васильева.
Гижысьлöн снимок вылын: Виктор да Иван Лопыревъяс.