[ A+ ] /[ A- ]

ШУИСНЫ МЕДВОДДЗАÖН

Май 1-öд лунö республикаса веськöдлысьяс кыпыда восьтìсны юркарса Стефановскöй эрд вылын «Удж серти медбур» нимöдан пöв. Эм сэнì снимокыс и районса бурдöдчанìнысь врач Феликс Николаевич Гуляевлöн. Фотоыс кутас öшавны во гöгöр чöж.

Феликс Николаевичöс районын тöдöны унаöн. Сìйö 35 во бурдöдö Эжва йывса олысь-ясöс. Кык во вöлì районса медшöр врачöс вежысьöн да квайтöс районса медшöр врачöн, 10 во райсöветса депутатöн да 4 во Коми АССР-лöн Верховнöй судса народнöй заседательöн.

— Унаöн чайтöны, мый ме нэмсö бурдöда йöзöс, но тайö абу тадзи, врачö велöдчи сёрöнджык, — висьталìс Феликс Николаевич.

Ф.Н.Гуляев чужис да быдмис Кулöмдìнын. Керканыслöн öшиньяс видзöдìсны Эжва вылö, код сайын вöлì аэродром. Ичöтсяньыс аддзис, кыдзи лэбзьöны да пуксьöны самолётъяс, да кöсйис лоны лётчикöн. Но 8 класс помалöм бöрын батьыс да мамыс, кодъяс уджалìсны Усть-Куломскöй леспромхозын, вöзйисны мунны Ухтаса лесотехническöй техникумö. Кывзысис. Но велöдчис сöмын 9 тöлысь да бöр локтìс гортас, пырис 9-öд классö. Но шöр школа эз помав, босьтчис уджавны Кужбинскöй лесопунктын. Лесопунктса веськöдлысь индìс велöдчыны токарö. Велöдчигмозыс тшöтш слесаралìс. Техника дзоньталöм бöрын час позис ветлöдлыны дзоньталöм тракторöн ли машинаöн да весиг бульдозерöн. Вöлì нимкодь, но Феликс Николаевич эз вунöдлы лётчикöн лоны кöсйöмсö. Пырис рытъя школаö. Луннас уджалìс, а рытнас велöдчис. Некутшöм кокньöд эз вöв. Удж вылö Кебанъёльö ветлìс подöн. Мунлìс 6 час асылын, а гортас волìс 4 час бöрын. Нуръясьыштöм бöрын котöртлìс школаö. Урокъяс мунлìсны 11 час войöдз. Школасö помалìс бура да сетìс документъяссö лётнöй училищеö. Но эз шогмы дзоньвидзалун вöснаыс да армияöдзыс уджалìс лесопунктын. Служитìс зенитно-ракетнöй часьтын. Асьсö петкöдлìс бур боксянь, лоис ефрейторöн, мöд класса специалистöн, бура служитöмысь лэдзлìсны отпускö. Гортас локтöм бöрын мöд лунас жö пырис уджавны аэропортö. Примитìсны техникöн да тöлысь да джын кежлö мöдöдлìсны велöдчыны юркарö. Аэропортын уджалìс во. Доймылìс. Бурдöдчигас чужис кöсйöм лоны бурдöдысьöн да отсавны висьысь йöзлы. Шыöдчис райисполкомö, корис мöдöдны Архангельскса медицинскöй институтö. Но сылы воча эз мунны, ыстысисны сы вылö, мый помалìс рытъя школа да босьтìс эз джуджыд тöдöмлунъяс, велöдчыны врачö оз вермы. Феликс Николаевич ловнас эз усь, помалìс вештана курсъяс да мукöдъяскöд тшöтш бура сдайтìс экзаменъяс. Но оланìн эз сетны. Во джын узьлìс кöнì веськалö, бöрыннас олìс пöрысь гозъя ордын. Сы кодьыс вöлìны унаöн. Öткымынöн эз вермыны венны сьöкыдлунъяссö да шыбитìсны велöдчöмсö. Бöрынджык оланìн векжö сетìсны. Мöд курсын гöтрасис ас сиктса ныв вылö, кодкöд вöлì тöдса водзынджык нин. Елена Васильевна велöдчис тайö жö институтас, но ыджыдджык курсын.

Велöдчис бурдöдан делö факультетын 6 во да öти во юркарын интернатураын. И 35 во уджалö öти местаын — районса бурдöдчанìнын. Танì жö и гöтырыс. Елена Васильевна бурдöдö 40 во.

Гозъялöн кык пи. Ыджыдджыкыс — Андрей — ассьыс олöмсö йитìс милициякöд, Василий мунìс бать-мамлöн кок туйöд, помалìс Ярославльса медицинскöй институт.

Ф.Н.Гуляев абу сöмын бур врач, но зэв киподтуя морт: тшупсьö, тэчö пачьяс, кужö куричасьны да с.в. Радейтö прöст кадö кыйны вугыр шатинöн чери.

Феликс Николаевич став олöмсö сиис йöзöс бурдöдöмлы. Уджалìс сöвесьт серти. Пасйисны «Ветеран труда» медальöн да «За безупречную службу Республике Коми» пасöн. И со районын медводдзаöн шуисны удж серти медбурöн.

— Республикаса нимöдан пöв вылö снимокöс öшöдöм — менам олöмын ыджыд лоöмтор, — висьталìс Ф.Н.Гуляев. — Таысь меным зэв нимкодь. Татшöм ногöн менö пыдди пуктöмыс ышöдö уджавны нöшта бурджыка.

Николай ЛЮТОЕВ.

Комментарии:

Комментарии запрещены.

Свежий выпуск: 28 марта

Осторожно — мошенники!