[ A+ ] /[ A- ]

Канаваын

* Деревняын 17 овмöс, 34 морт. Но пыр олö сöмын 19. Мукöдыс волывлöны чужанiнö сöмын гожöмын. 34 мортысь 16-ыс нывбаба, 18 айлов, 23 пенсионер, ыджыд арлыда 3 морт. Медся ичöтлы 14 арöс.

* Йöзыс надзöникöн чинö. 2011 воын кулiс öти, тавося 4 тöлысьöн ― 2 морт. Őти мунiс овны бокö.

* Удж абу. Ас овмöс оз котыртны. Нёль во сайын кö вöлi сизим мöс да кукань, то öнi сöмын Августа Михайловна да Геннадий Егорович Нестеров гозъя видзöны мöс да öш. Налöн куйöд тырмö сöмын аслыныс. Мукöдыс пуктысьöны вынсьöдтöм муяс вылö. Г.Е.Нестеров жö заптылiс вöр да кутiс пилорама. Но важ тракторъяс киссисны да тайö уджысь ковмис эновтчыны. Колис сöмын важиник МТЗ. Сiйöн ваялöны пес, турун да вöчöны мукöд удж.

* Тырис да ляпкалiс Войвыв Екатерининскöй канал, но ыджыд ва дырйи позьö ветлыны мотора пыжöн Перымлань кыйны чери. Шедö весиг стерлядь да судак. Канал видзöдлыны волöны унаöн, сы вöсна мый Канаваöдз бур туй, позьö воöдчыны легкöвöй машинаясöн во гöгöр чöж. Туйсö дöзьöритö да тöвнас весалö лымйысь «Вычегда-Дорстрой» котыр. Но деревняас локтысьяслы шойччынысö некöн. Ас вылö уджалысь В.В.Белый некымын во сайын нин кöсйис вöчны туристъяслы керка, но эз на босьтчы. Лоö кö туристъяслöн могмöданiн, лоö и деревняса олысьяслы удж.

* Канаваö районын медводз вайлiсны тöвру помысь би сетан станция. Сувтöдiсны вöвлöм аэродром вылö. Но пыр жö сотчалiсны электроприборъяс. Ковмис бöр вуджны дизель вылö. Би сетöны сöмын рытнас. Та вöсна холодильникъяс оз ньöбавны, вöдитчöны кöзöдöн.

* 19 во сайын бурдöдысьлöн мунöм бöрын тупкылiсны фельдшерско-акушерскöй пункт. Но керкасö видзöны. Őнi Югыдъягса бурдöдчанiнысь фельдшер волывлö быд тöлысь (мукöддырйиыс кыкысь) да нёрпалысьясöс примитö сэнi. Сьöкыда висьысьяс дорö ветлö гортöдзныс. Корöм серти вайö лекарствояс.

* Тöлысьöн öтчыд волывлöны Югыдъягса администрацияысь уджалысьяс. Почта вайöны вежонöн öтчыд, сёян-юан — тöлысьöн кыкысь. Книгаяс да журналъяс вайлö Югыдъягса культура керкаысь библиотекар Г.А.Карманова. Канавасаяс ёна лыддьысьöны. В.А.Мартюшёв радейтö ― фантастика, В.П.Касев ― фантастика, детективъяс да прикючениеяс, М.В.Моторина да П.Ф.Мартюшев ― классика да поэзия.

* Канавасаяс радейтöны уджавны му вылын: быдтöны картупель, капуста, лук, морков, öгурцы, помидор. Дзоридзьяс мичмöдöны В.Т.Погуляевалысь керка дорсö. Велöдчö быдтыны «Сад и огород» журналысь. Нина Ивановна да Григорий Николаевич Юдинъяс сувтöдiсны град йöраныс поликорбонатысь теплица.

* Пöшти быдöнлöн эм пу пыж. Вöчалöны асьныс. Торйöн нин бур пыжъяс артмöны Г.Н.Юдинлöн.

* Канавасаяс нималöны бур вöралысьясöн да чери кыйысьясöн. Найö оз вермыны овны вöр-ватöг. Ставыс 8 вöралысь да 9 чери кыйысь.

* Майшöдлö таксофон. Тшöкыда пуксьöны батареяяс да связь орлö. Эм öти легкöвöй машина да ёна колiгöн воöдчöны Югыдъягöдз.

Николай ЛЮТОЕВ.

Комментарии:

Комментарии запрещены.

Свежий выпуск: за 14 ноября