Водзтi Улыс Вочын быд овмöсын видзлiсны öти ли кык вöв, мед вайны пес, турун, пуктысьны. Но во вит сайын найö висьмисны да видзöмсьыс эновтчисны, вочасöн лöсьöдiсны лым вывтi ветлан техника. Талун кежлö татшöмыс öкмыс, морт лыд серти районын медся уна буретш «Улыс Воч» овмöдчöминын. Матö ставныс и чукöртчылiсны, кор татчö волiс Гостехнадзорлöн районса юкöнысь начальник Михаил Николаевич Никифоров.
— Татшöм техникыд ылi сиктын да ас овмöсын зэв колана. Матö ставöн олöны скöтöн да тöлын колö ваявны турун, пес. Ме ветла и вуграсьны, новлöдла садйö кагаöс. Менам эм и лым вывтi ветлан дзоляджык техника, — висьталiс Андрей Николаевич Касев.
— Ме ола Кирö сиктын, кодi туй кузя матö куим километр сайын. Лым усьöм да ю кынмöм бöрын ме тайö техникаöн вöча-таляла аслым километр джын кузя веськыд туй. Коймöд во нин сiйöн ваяла турун да пес. Кирö сиктын матö став олысьыс рöдвуж да отсала и налы. Корсюрö кодöскö вайла и бурдöдчанiнö, — висьталiс Александр Васильевич Касев.
— Тайö техникаыс мекöд тшöтшъя, 1979 вося. Ньöблiс батьöй, но ёна эз вöдитчы. Вуджöдi ас вылö, — шуис Андрей Иванович Кочанов.
— Лым вывтi ветлан техникасö босьтi кольöм воын. Зэв бур, мый техникасö гöгöрбок видлалöм могысь волöны сиктöдз. Меным колö велöдчыны да босьтны право, мед повтöг видз вылысь вайны турун, вöрысь пес, ветлыны вуграсьны, — тöдчöдiс Сергей Фёдорович Морохин.
Талун Гостехнадзорлöн районса юкöнын пасйöма йöзлысь да спорт юкöнлысь лым вывтi ветлан 70 машина, а збыльвылас сiйö ёна унджык. «Ростелекомлöн» районса юкöнлысь, Лунвыв электрическöй сетьяслöн районса юкöнлысь, чери кыйöм кузя федерацияса агентстволöн Кулöмдiнса участоклысь татшöм техника пасйöма бокын, но найöс районын быд во видлалö М.Н.Никифоров. Кызвыныслöн эм ветлöм могысь удостоверение. 2015 вося ноябр 28 лунöдз татшöм техника кутысьяс право босьтöм могысь велöдчисны ас кежысь, районса юкöнын сдайтiсны экзамен да танi жö 10 во кежлö сетлiсны удостоверение. А öнi тöдöмлунъяс быть колö босьтны торъя велöдчанiнын, кодöс регыд на восьтiс юрсиктын ва вылын дорйысьяс ставроссияса котырлöн республикаса юкöн. Экзамен, кыдзи и водзтi, примитас Михаил Николаевич. Туйвывса правилöяс кузя кöкъямыс, лючки уджöдöм кузя вит юалöм.
Трактористъясöс да лым вывтi ветлан техника кутысьясöс кутасны велöдны и Помöсдiнса «Патриот» клубын. М.Н.Никифоров видзöдлiс велöдан жыръяс да велöдны коланаторъяс. Ставыс лючки-бур да сетас свидетельство, кодöн клубöн веськöдлысь А.А.Глуханич велöдöм вылö лицензия босьтöм могысь шыöдчас велöдан министерствоö.
— Тадзи местаяс вылö волiгöн ме эрдöда ог сöмын правилöяс торкалöм, но и гöгöрбок видлала техникасö, примита экзаменъяс да сета удостоверение. Закон пыдди пуктысь йöз, кодъяс ньöбöны тайö техникасö, звöнитöны меным да ветла места вылöдз, видзöдла гöгöрбок да пасъя. Но эмöсь чина йöз, зумыда олысь асшöр уджалысьяс, весиг право доръян юкöнъясын уджалысьяс, кодъяс ризъялöны правотöг. Пасъя, мый лым вывтi ветлан техникаöн оз позь мунны туй кузя, сöмын неыджыд юкöн либö вуджны. Техника кö пасйытöм инспекцияын, сiйöс ыстам «шойччыны» сулöданiнö. Кыскам и кывкутöмö, абу кö сьöрсьыныс техника вылö документъяс, водительлöн удостоверение, эз кö ас кадö петкöдлыны техникасö. Урчитöмторъяс колö пыдди пуктыны быдöнлы, — кывкöртiс М.Н.Никифоров.
Марина ДАДАШОВА.
Гижысьлöн снимок вылын: М.Н.Никифоров Улыс Вочын.