[ A+ ] /[ A- ]

Кыдзи юöртлiс биысь в1чысян да йöзöс доръян службалöн республикаса управление, биысь доръян службалöн Кулöмдiн районса 14-öд отряд лоис республикаын 2016 вося смотр-конкурслöн кывкöртöд серти медбурöн. Пасъям, мый тайö нимсö Кулöмдiн районса би кусöдысьяс шедöдiсны нёльöдысь.
Биысь видзчысян да йöзöс доръян служба кузя республикалöн управлениеса начальник Александр Сыскин сетiс тайö отрядса начальник Н.П.Расовлы медводдза тшупöда диплом да кубок. Пасъям, мый сылы вичмис и отрядса медбур начальниклöн ним.
Кыдзи висьталiс Николай Павлович, отряд котыртчылiс 2009 воын да сэксянь и начальникалö. Ыджыд котырö пырö вит часьт: Ручын, Помöсдiнын, Зимстанын, Югыдъягын, Великопольеын. Сiдзжö эм квайт торъя пост.
— Отсалам йöзлы, петавлам отсöгöн туйвывса неминучаяс дырйи. Век петкöдчам республикаса ордйысьöмъяс вылын. Тшöкыда ветлывлам челядь дорö, миян дорö волiгöн петкöдлам налы кусöдчан техника, сеталам гижöдъяс, кодъяс велöдöны овны видзчысьöмöн, быд во нуöдам на пöвстын серпасасьöм кузя конкурс. Öшлам найöс часьтъясын, медбуръяссö мöдöдам карö. Победа лунö мичмöдам казьтылан пасъяс. Öтка йöзлы отсалам дзоньтавны керка вевтъяс, весавны найöс лымйысь. Миян котыр бур, уджалам öтув, öта-мöднымöс пыдди пуктöмöн. Кыдз ме чайта, тайö и отсалö лоны медбурöн да ышöдö бура уджавны водзö.
Галина КЛЮЖЕВА.
Снимок биысь видзöм да йöзöс дорйöм кузя службаса управлениелöн сайт вылысь.


Комментарии:

Добавить комментарий