Март мöдöд лунö медматысса ёртъяс пöвстын пасйисны зарни кöлысь Ольга Васильевна да Евгений Валентинович Ярковъяс.
Ветымын во сайын Евгений да Ольга босьтiсны Кудымкарса вöр техникум помалöм йылысь диплом. Том гозъяöс ыстiсны уджавны миян районö. Тшöктiсны бöрйыны Озъяг либö Кебанъёль вöр посёлокъяс. Сувтiсны бöръяас. Нэм чöжныс зiлисны вöр дорын.
Евгений Валентинович уджалiс мастерöн, сюрлiс и вöр кылöдны. Олöмыс вайöдлiс и туй вылö чорыд веркöс вöчан заводö. Ставнас уджалан стажыс öкмис 40 во.
Ольга Васильевналöн том кадыс колис муса верöсыскöд. Уджавлiс лесопунктын, леспромхозын, зiльлiс и экономистöн. Уджвывса стажыс артмис 35 во.
Быдтiсны да кок йылö сувтöдiсны кык челядьöс. Öнi сьöлöмнысö шонтöны 6 внук да 1 правнук.
Том дырйиныс окотапырысь зiлисны и посёлоксаяскöд öтувъя уджын. Кöзяйствоаныс видзлiсны порсьясöс, кроликъясöс да кукъясöс. Вöдитлiсны и град выв пуктасъяс.
Ольга Васильевналы ёна воöны сьöлöм вылас мича дзоридзьяс. Öнi нин öшинь вылас чурвидзöны петуния, бегония да мукöд син гажöдысь дзоридзлöн ичöтик петасъяс. Нывбаба на йылысь «мойдö» мелiа, быттьö найö кылöны да гöгöрвоöны висьталысьöс. А верöсыслöн небыда нюмдыштöмыс быттьö шöпкöдö, мый гöтырыслысь сьöлöмкылöмъяссö тшöтш жö юкö.
Со кутшöм шань да мелi йöз олöны Кебанъёльын.
Нина Плескач.
Снимок гижысьлöн.