Гöри ты

Войвыв Кöтйöм ю вомсянь куим километрöн вевдорасджык, веськыдладор берегас виска ты. Танi водзтi вöлiны кылöдчан конторалöн, кодi котыртiс да нуöдiс районын, тшöтш и Кöтйöм вожын, кылöдчан уджъяс, став коланаторъясöн складъяс (материальнöй юкöн, запаснöй часьтъяс, уджалан кöлуй, сёян-юан). Татчöдз вайöмсö разöдлiсны водзö — мукöд посни и гырысь юяс вылö. Складъяс кындзи вöлiны и оланiнъяс, сы вöсна мый öтырышъя бергöдчисны йöз да налы колiс шойччыштны. Вöлiны юрсюянiнъяс и овмöс вöсна кывкутысьяслöн да сiйöс видзысьяслöн. Öти кывйöн кö, керка чукöрсö да складъяссö позис шуны ичöтик посёлокöн. Збыльвылас шуисны роч ногöн перевалочнöй базаöн.

Подков кодь тыыслöн медводдза кöзяинöн вöлi зэв бур кузьнеч Михаил Тимонович Лютоев. Сiйö вöдитiс танi и лэчтуй. Öнi кыйсьö Владимир Михайлович Гудырев, кодлöн танi эм вöр керка.

Медсясö тыын олöны сын, ёдi, сир, ёкыш. Шöркодь джудждаыс öти метрсянь кыкöдз, но эмöсь и джуджыдджыкинъяс.

Бур вотчанiнъясöн оз нимав, та вöсна йöз Гöри тыöс ордйöдöны.

Быдтысьöны уткаяс, пуксьылöны лэбысьяс. Ягъясын-егыръясын эмышт на звер-пöтка.