Анна Алексеевна Блинова чужис 1932-öд вося январ 15-öд лунö Пивъюын. Бать-мамсö войвылö ыстылiсны Саратов обласьтысь сы вöсна, мый налöн кык семья вылö вöлi трактор, да лыддьысисны озыръясöн. Тшыгъялöмысла батьыс кувсис во мысти, да мамыс öтнас лэптiс челядьсö.

Надежда Александровна Турьева чужис 1933-öд вося сентябр 23 лунö Носимын. Война вылö батьсö босьтiсны 1943-öд вося февраль 23 лунö. Квайт тöлысь мысти воис юöр, мый батьыс вöрöг пуля помысь кулiс Смоленск обласьтын. Война пансигöн Надежда Александровна вöлi ичöт на да омöля тöдö челядьдырсö. Ыджыд тыш кусiгöн велöдчис нёльöд классын. Вöлi мунö урок. Кодкö таркöдчис öдзöсö. Велöдысь петiс классысь да эз пыр бура дыр. Кылiс бöрдöм шы. Вöлöмкö, школаö локтöма война вылö ветлысь Валентина Николаевна Тарабукина да висьталöма, мый воис Победа лун. Пырис велöдысь Елена Ивановна да шуис, мый талун урокъяс оз лоны. Челядьöс ыстiс гортаныс да тшöктiс ставныслы висьтавны война кусöм йылысь. Нывка мунiс Анна тьöткаясас, сэнi мамыс да некымын нывбаба мыськалiсны керка. Надежда горöдiс: «Вайи бур юöр, помасис война!» Нывбабаяс кутiсны бöрдны нимкодьысла. Тайö луныс аньлöн öнi на син водзас.

Тимшерса школаысь дас öтиöд класса велöдчысь Карина Крупнова вермис литератураысь ставроссияса олимпиадалöн республикаса тшупöдын.

Февраль 27-öд лунö пытшкöсса делöяс кузя министерстволöн район юкöнса начальник А.М.Литвинов нимöн, вичöн да овöн ыдждöдлöмöн 14 арöса нывкаяслы да зонкаяслы кыпыда сетiс Россияса гражданинлысь паспорт. Андрей Михайлович велöдчысьясöс да налысь бать-мамöс, пöль-пöчöс чолöмалiс тайö тöдчана лунöн. Миграция юкöнса начальник Н.Н.Торлопова тöдмöдiс паспортлöн артмöмöн, историяöн, петкöдлiс сöвет кадсясö, кодöс сетлiсны 16 арöсын да паспортын мортыслöн вöлi куим снимок. Медводдза лист бокас 16 арöсöн, кор мортыс босьтiс документ. Содтiсны, кор тырис 25, сэсся 45 арöс. Кыдзи и öнiяас, сэки пасйылiсны, кöнi мортыс олö. ЗАГС-лöн юкöн гижлiс öтлаасьöм да юксьöм йылысь юöръяс да челядьöс, бурдöдчанiн — вирлысь группа да резус-фактор. Киссис СССР, лоис Россия Федерация да Россияса гражданинлысь паспорт кутiсны сетны 14 арöссянь. Надежда Николаевна нуöдiс викторина. Юкöнса инспектор Н.В.Кулалаева висьталiс, мый паспорт вежны колö 20, а сэсся 45 арöс тырöмöн, а сiдзжö кор мортыслöн вежсис нимыс, вичыс либö овыс. Воштасны кö тайö документсö, корис пыр жö шыöдчыны юкöнö.

«Культура» национальной балалöн «Культураын ас окотаöн отсасьысьяс» уджтас серти кольöм вося августын кык вежон кежлö Псков обласьтса Печоры карö республикаысь ветлiсны кызь вит морт, районысь — дасöн. Пырöдчисны культура керкаясса да клубъясса, библиотекаясса уджалысьяс, дизайнерö, архитекторö велöдчысь студентъяс да мукöдъяс. Студентъяслöн тайö вöлi практикаöн.