Тайö кывъяссö ме лыдди Евгений Егорович Уляшевлöн «Окота овны» кывбурысь. Кутшöм стöча мöвпалöма гижысьыс. Да, да. Мортыслы олöмсö Енмыс сетöма бурторъяс вöчöм вылö. А лэдзчысьнытö, горшасьнытö, юнытö, гусясьнытö, вöр-ватö гудыртнытö, пемöсъяс вылын тешитчынытö, лёк вöчнытö оз ков, оз позь. Лыдди Ёгор Женьлысь кывбуръяссö да, быттьöкö, менсьым мöвпъясöс удитöма тшöтш водзынджык нин гижны. 100-ысь унджык кывбур, эмöсь и шемöсмöдана висьтъяс, «Ленин туйöд», «Парма гор» газетъясын, «Войвыв кодзув» журналын йöзöдчöмъяс.

Меным сетiсны зэв нин важся кык снимок. Öтиас эськö зэв унаöн снимайтчöмаöсь, мыш саяныс — удж выланыс вöчöмторъясыс: уна пöлöс улöсъяс, пызанъяс, тыдалö джаджъяса камод. Мышкас гижöма, мый снимайтчöмаöсь 1958 воын райпромкомбинатын уджалысьяс. Лыддьöдлöма сöмын нимъяснас: Толя, Витя, Прокопий, Афанасий, Миша, Иван, Ким, Женя, Вася, Володя, Иван Александрович, Федя, Миша Кистёв, Зина, Агния, Аня, Нида. Но газетö йöзöдны оз шогмы, снимокыс сьöд, омöля тыдалöны чужöмъясныс.