Туйсö восьтiс «Родничок»

 Кулöмдiнысь Христина Швендра ичöтсянь радейтö сьывны да йöктыны, эз пов петкöдчыны йöз водзын. Та вöсна и бöрйис Сыктывкарса педучилищелысь шылад, дизайн да сервис юкöн.

 — Пыр мöвпалi аскиа уджöс йитны челядькöд да шыладкöд, 9-öд класс помалöм бöрын мунi велöдчыны шылад велöдысьö, — сёрнитiс Христина. — Садйö ветлiгöн на челядьлысь енби сöвмöдан районса керкаысь «Родничок» котырöн веськöдлысь Людмила Николаевна Кирушева казялiс менсьым сьылöмöс да вöзйис мамлы водзö сöвмöдны енбиалунöс. Медводдза классö пырöмсянь и котралi «Родничокö».

 Педучилищеын мöд велöдчан во панасын заводитчис нин практика. Ветлö садъясö да школаясö, дасьтысьö да нуöдö челядьлы шылад урокъяс. Нывкаяс да зонкаяс пыр виччысьöны Христинаöс, да и аслыс таысь сьöлöм вылас нимкодь, окотапырысь уджалö накöд.

— Медводз полыштi. Гöгöрвоана, тöдтöм челядь. А сэсся венi ставсö, аскиа лун кежлö бура лöсьöдчöмöн да урокъяс кыпыда нуöдöмöн. Нёль вонад ветлi уна школа-садйö, — водзö висьталiс нывка.

 Урокъяс бöрын велöдöны ворсны шылад инструментъясöн. Христина ворсö нин фортепьяно, баян, синтезатор вылын, тавосянь босьтчис и гитараöн. Во помын сямсö донъяласны экзаменъяс вылын. Велöдöны сьывны хорöн, нöшта кывъястöг нота шуалöмöн, рочöн сольфеджио. Кольöм воын академическöй вокалöн «Студвесна» конкурсын лоис коймöдöн. Сольфеджиоысь олимпиадаясын пыр вермысьяс лыдын.

 Став кадыс мунö велöдчöмö, сы вöсна гежöда волö чужан сиктö. А сьöлöмыс ёна кыскö, öд гортын бать-мам, куим чой да ичöтик вок. Христиналöн ичöтджык чойыс тшöтш сьылö «Родничок» котырын, кöсйö мунны ыджыдджык чойлöн кок туйöд. Мöдыс «ёртасьö» спорткöд, коймöдыс радейтö серпасасьны. Бать-мамлы нимкодь таысь. Педучилище бöрын бöрйöм туйвизьын Христина мöвпалö велöдчыны водзö. Но ковмас мунны мöд карö, юркарын татшöм велöданiныс абу.

 — Школа помалысьяслы сиа бöрйыны сьöлöм серти специальносьт, бура велöдчыны. Том специалистъясыд быдлаын коланаöсь. Кокниа аддзан удж да и асьтö олöмад. Студентъяслы сиа овны гажаа, öта-мöдлы отсасьöмöн, быдлаын водзмöстчöмöн, — кывкöрталiс Христина.

 Алёна Ермакова.

 Снимок Христиналöн чукöртöмысь.