Любовь Эдуардовна Четина матö кык во зiльö Кулöмдiн районса культура керкаын хормейстерöн. 2023–öд воын эштöдiс велöдчöмсö Сыктывкарса В.Т. Чисталёв нима культура колледжын да, кöть и олiс Сыктывдiн районса Паджгаын, локтiс овны Эжва йылö. Сiйö уджалö сьылан котыръяскöд, сэтчö ветлысьяслы отсалö пуктыны-лöсьöдны гöлöсъяс, велöдö сьыланкывъяс. Том ань дасьтö котыръяссö гажъяс, конкурсъяс да фестивальяс кежлö. Талун Любовь Эдуардовналöн веськöдлöм улын «Июль» йöзкостса сьылан да челядьлöн «Веснушки» ансамбльяс. Та кындзи уджалö и В.Т.Чисталёв нима «Эжваса дзоридзьяс» йöзкостса хоркöд да отсасьö «Красная гвоздика» ветеранъяслöн хорлы. Бöръя кадас став котырыс пырöдчисны уна сикас гаж, конкурс да фестивальясö. Медся ыджыдъяс пиысь – йöзкостса творческöй котыръяслöн парад, республикаса «Василей» да «Завалинка» фестивальяс.

Районса культура керкаын уджалiгöн Любовь Четина шедöдiс сямсö уна нырвизьын: вöлiс жюриын, пырöдчис концертъясö, конкурсъясö да фестивальясö кыдзи öтнас, сiдзи и котыръяскöд, нуöдiс гажъяс, ворсiс театра петкöдчöмъясын, отсасис режиссёрлы «Василей» гаж котыртiгöн. Уджыс Любовь Эдуардовналы ёна воö сьöлöм вылас. Зэв пö гажа да уна бур рöмъяса. Мöд ног кö, колö сетны уна вын, кад да лоны кывкутысь мортöн. Ань юксис талунъя культуралöн тöдчанлун йылысь аслас видзöдласöн.

– Ме аддза, кыдзи Кулöмдiн сикт лунысь-лун сöвмö, мичаммö да бурмö. Морт олöмын культура босьтö ыджыд пай. Отсалö йöзлы кутчысьны бурö, сöвмöдö öта-мöд дорö вежавидзöм, кыпöдö ловру. Кора волыны котыртöм гажъяс вылö, медым озырмöдны пытшкöс олöм.
Наталья Тимушева.
Снимок Любовь Четиналöн чукöртöмысь.