Югъяв туй вылын!

[ A+ ] /[ A- ]

Ар, велöдчан во панас, лунъяс дженьдаммöны и дженьдаммöны. Ог и казялöй, кыдзи рöмдö, кватитчан, да пемыд нин. Рöмдiгöн кö тыдалöны на туй вылын ветлысьяс, пемыдын, абу кö югзьöдöма туй либö улича, водитель оз нин аддзы найöс.

Туй вылын неминучаысь видзчысьöм могысь ыджыд удж нуöдiм миян «Улыбка» садса челядькöд. «Внимание — дети!» паса став Россияса удж серти котыртiм «Засветись на дороге» акция. Садйö волiс, велöдiс-öлöдiс, нывка да зонкаясöс корис лоны туй вылын вывтi сюсьöн ГИБДД-лöн районса юкöнысь госинспектор Яна Ивановна Зезегова. Ворсöмъясöн, туй вывтi «мытшöдъяс» вуджöмöн велöдiм, тöдмалiм, кутчысьöны-ö челядь урчитöмторъясö. Видзöдiм кино да мультфильмъяс.

Пöрччысянiнын да öтувъя ветланiнъясын лöсьöдiм стендъяс, буклетъяс да казьтыланторъяс, кöнi тыдалiс паськöм либö сумка вылын пемыдын би улын югъялан пасъяслöн коланлун да тöдчанлуныс.

Быд группаын воспитательяс лыддисны туй вылын видзчысьöм да лоöмторъяс йылысь висьтъяс, мойдъяс, кывбуръяс. Нывкаяс да зонкаяс эз сöмын кывзыны, но и донъялiсны лыддьöмын быд петкöдчысьöс. Челядь ворсiгöн вöлiны водительясöн, подöн ветлысьясöн, весиг инспекторъясöн. Котыртлiм и пызанвывса ворсöмъяс. Шöр группаса нывкаяс да зонкаяс вöчисны би улын югъялан пасъяс. Бать-мам да налöн быдтасъясöн дасьтöм серпасъясысь лöсьöдiм выставка, кöнi петкöдлiсны кутшöмöн аддзöны аскиа югъялан пассö.

Эскам, челядь ворсöмъясöн велöдчигöн ставсö сюркнялiсны пель саяныс, видзчысьöмöн кутасны ветлыны туй кузя, кутчысясны туй вылын урчитöмторъясö.
Галина Савицкене, Ольга Печеницына.
Снимокъяс Виктория Ракиналöн.

Комментарии:

Добавить комментарий

Свежий выпуск: 22 февраля

https://www.gosuslugi.ru/help/faq/mobile_election/2100910

Осторожно — мошенники!