«Талун ставныс гортасöсь», — ас кыпöдöм, зэв пелькыник керка дорö матыстчигöн мöвпыштi ме. Пыри, а кухняас тапикасис ичöтик Лёня, öти киас машина, а мöдас пустышка. Муртса кык арöс сылы. Мыччысис и кöзяйкаыс — Анна Алексеевна Холопова. Ме юалi, кöнi нöшта кык айловыс. Анна Алексеевна нюмъёвтiс: кайисны пö Кулöмдiнö, цирк локтöма да, видзöдны. Сiдзкö, Сергей Николаевич кöзяиныс да квайт арöса Саша гуляйтöны юрсиктын. Кухняас и пуксим сёрнитыштны.

Анна Алексеевна ачыс Керчомъяысь, гашкö, сiйöн на меным любö варгынысö сыкöд, ме öд сэтысь жö рöднам.

— Ме Надежда Дмитриевна да Алексей Михайлович Поповъяслöн öтка ныв, — висьтасис сiйö. — Помалi сэтчöс школа, а сэсся велöдчи юркарын пусьысьö. Уджысь орöдчывтöг нöшта велöдчи бухгалтерö, а сэсся и социальнöй уджалысьö. Ручö локтi 2016-öд воын, а Сергей верöспукöд тöдмаси 2015-öд воын. Сiйö сэки уджалiс кусöдчан часьтын, и öнi на сэнi зiльö. 

 Том гозя босьтчисны кыпöдны аслыныс оланiн, шоныд поз. Öдйö, кык воöн и лэптiсны чача кодь мича керка, 2018-öд воын овмöдчисны нин. Анна Алексеевна зэв варов, лабутнöй, кужö и кывзыны, и ачыс тöлкöн сёрнитö. Социальнöй уджалысьнад колö на и кужны йöзыдкöд сёрнитнытö, тöдны налысь тöжд-могъяссö. Сиктным кузь, да быдöн дорö лоö вевъявны ветлыны. Уджыс аньлы сьöлöм сертиыс, гашкö, сiйöн и кокниöн кажитчö. Гортас удитö на бергöдны став уджсö. Гöгöр сöстöм, зэв кыпыд, уна дзоридз. Гожöм-арын радейтö ноксьыны градъяс дорын, пуктö-дöзьöртö унатор. Челядь вылö кадыс кыкнанныслöн тырмö. Эжва дорö купайтчыны ветлывлöны, радейтöны и походасьны. Выль во кежлö Сергей верöсыс век вайлö ыджыд коз, сы дорын гажöдчöны челядькöд. Анна Алексеевна висьталiс, мый бать-мамыс тшöкыда волывлöны Керчомъяысь, мед сöмын тöлк вöлi-а. Сергей Николаевичлöн бать-мамыс абуöсь нин, но чойясыскöд, Любовь да Алёнакöд, олöны ёртасьöмöн. Анна Алексеевна уна во сайын локтiс Ручö, танi лоис нин ас мортöн. Пыдди пуктöны сiйöс и сиктса йöз, и удж вылас. Кыпыд поз лöсьöдiсны Холопов гозъя, сэнi, майбыр, шоныд, тöдчö öта-мöдсö гöгöрвоöм, пыдди пуктöм. И ассьыныс муслунсö сетöны ичöт пияныслы. Мед лоöны шудаöсь ставныс. 

 Екатерина Ульнырова.

 Снимокъяс Анна Холоповалöн.