Кулöмдінысь снимайтчысь Иван Чаланов, коді бура тöдса нин районын, петіс медбуръяс лыдö «Nature Photo Team» компаниялöн Россияса тöдчана конкурсын, кöні петкöдчисны медсясö Россия пасьтаысь, да весиг сы сайысь на нималана фотографъяс. Том мортлöн 19 вöзйöм уджысь кык снимок шедöдіс мöдöд места да нöшта кык – петіс финалö. Мыйöн вöрзьöдісны найö конкурсын петкöдчысьяслысь уджъяс донъялысьясöс, та йылысь видзöдлам паськыдджыка.

Воддза воясын веськöдчыліс Ырымö, кытчö комын километр воöдчис ю кузя, сэсся нöшта подöн километрöнджынйöн. Татчöс мича местаясын вöчöм снимокъясысь öти, «Шонді, сус пуяс, ру» нима, и лоис öнія конкурсын медбуръяс лыдын. Мöд места шедöдысь жö мöд снимокыс – «Тöвся кодзула енэж улын». Вöчис сійöс Кулöмдінсянь кызь километр сайын öти тöвся кöдзыд войö.

Иван Чаланов аслас уджъясöн таöдз петкöдчыліс Россияса и мукöд конкурсъясын. Тöдчанаджыкöн вöліс «Золотая черепаха» войтыръяскостса конкурс, кöні 15 сюрс удж пиын сылöн «Метеор над Авророй» нима снимокыс веськаліс финалö. Тавося тайö тöдчана конкурсын петкöдчöмыс да медбуръяс лыдö веськалöмыс, кыдз ачыс шуö, – тайö медся ыджыд вермöм. Чайтсьö, мый том снимайтчысьлöн тайö абу бöръя, аслас чуймöдана мича снимокъяснас шензьöдас на водзö да шедöдас выль вермöмъяс…
Водзö лыддьöй март 28-öд лунся газетысь.
Галина Нестерова.
Снимокъяс Иван Чалановлöн чукöртöмысь.