Пыр на сьöлöмын йöлöгаыс

Сöмын сир курыд шог миянлы вайис Афганистанын мунысь война. Мöд му вылö отсöгöн миян войска пырисны 1975-öд вося декабр 25-öд лунö. Ок кутшöм сьöкыд вöлi лöнь олöмысь армияö мунысь 18-19 арöса зонъяслы: юр весьтын пыр дзизъялiсны пуляяс, луннас пöдтiс жар, шон-дi сайын вöлi 56 градусöдз, а войяс кöдзыдöсь, лыа турöбъяс дойдiсны син. Нöшта на кок улын чушкысь змейяс, варанъяс, скорпионъяс да кулак ыджда яда чераньяс. Эз тöдны, мый водзö виччысьö найöс. Торйöн нин сьöкыд вöлi биа Афганистанö медводдза нырö веськалысьяслы.
-Кодйысим пидзöсöдз няйт пиын, сэтчö сатшким 8 местаа палаткаяс, мед узянiныс вöлi мусьыс улынджык, — панiс сёрни Дереваннöйысь Александр Михайлович Ульянов. Школа помалöм бöрын велöдчис водительö. 1979-öд вося июньын помалiс, армияö нуисны сiйö жö воын октябр 13-öд лунö.
Медводз веськалiс Свердловскö. Кад кольöм бöрын сетiсны выль форма, пуксьöдiсны поездö и нуисны. Туйын нин юöртiсны, мый мунöны медся ыпъялысь ылi муö тышкасьны сэнi быд гуран да мыльк тöдысь айловъяскöд, кодъяслöн киныс эз дзöр том зонъясöс лыйлiгöн. Узбекистанса Чермес карын сетiсны выль «Урал» машина. Александр Михайлович веськалiс 108-öд мотострелковöй дивизиялöн 333-öд торъя батальонö, вöлi рядöвöйöн, старшöй водительöн. Кабулсянь Баграм карöдз новлöдлiс мукöд взводъяслы боеприпасъяс, лекарство да сёян-юан. Бронетранспортёръяс, танкъяс да вертолётъяс колльöдлiсны кызь-комын машинаысь колонна. Колiс быдöнлы лоны вывтi сюсьöн.
Öтчыд Александрлöн син водзас виисны сöмын на локтысь салдатöс. Душман гöра йывсянь веськыда сизьдыштiс сыö. Вöрöглöн пуляыс суöдiс и Кулöмдiн районысь жö Сергей Тарабукин ёртсö. Гортас вайисны цинк гортйын. Бырлас-ö коркö бать-мамлöн, матыссаяслöн Афганистан би пыр мунысь зонъяс понда дойыс, дыр-ö на сöдзтысяс миян сьöлöмын лёк шыа йöлöгаыс? Абу гöгöрвоана, кыдзи сöмын зонъяс ас вывтiныс нуисны татшöм шогсö. Сыктывкарын олысь Михаил Дмитриевич ёртыскöд тшöкыда казьтылöны öтлаын служитысьяссö. Öти ротаын Кулöмдiн районысь вöлiсны квайтöнöсь. Унджык войсö коллялiс машинаын. Прамöя мыссьöм, пыв-сьöм йылысь и сёрни абу. Афганистанса би улын Александр вöлi матö кык во 1980-öд вося январ 25-öд лунсянь 1981-öд вося ноябр 26-öд лунöдз. Повтöмлунысь пасйисны медальясöн да пасъясöн.
Гортас локтöм бöрын аддзис ассьыс шудсö Дереваннöйысь жö Валентина том нылöс. Поздысисны, лэптiсны кык судта керка. Шуда том гозъялöн чужисны кык ныв да пи, ставныс петiсны ас олöмö. Александр нэмыс трактористалiс совхозын, öнi зiльö асшöр уджалысь дорын вöрын.
Кургöны-олöны Александр Михайлович да Валентина Александровна кыкöн, лэччывлöны карö видлыны куим внук-внучкаöс. Но службаыс оз вун.
Гижöд да снимок Татьяна Чувьюровалöн.