Кор воö тöв, вайö аскöдыс лым да кöдзыд поводдя. Ёна кöдзыдыс тайö тöвнас эз на и вöв. Лымйыс жö усьö зэв уна. Со и Донын зільö быд лун Василий Васильевич Ивашев.

Мужичöй 2013–öд воын воштiс öти кисö. Та вылö видзöдтöг быд лун весалö лым кык джуджыд пос вылысь да нöшта на и лöпёг 12 чукöртанiн дорысь. Босьтчис уджö сиктса администрациякöд сёрнитчöм серти. Дерт, весавны та мында лым абу кокньыд, но кык челядя мужичöйлы отсалö сылöн семья да мотобуксир, код отсöгöн Василий ветлöдлö сикт кузя.

Василий Ивашев чужис да быдмис Кöрткерöс районса Сюзяыб грездын. Донö волывлiс рöдвуж ордас. Армия бöрын сiйö бара на локтiс гöститны Кулöмдiн районö. Сэки том зон, кодi сöмын на служитiс пограничникöн Китай да Монголия костын, тöдмасис Донысь Иринакöд. Гортас мунöм бöрын нылазонма кутiсны сёрнитны öтамöдныскöд телепон пыр. Сэсся Василийлöн батьыс волiс корасьны Дон сиктöдз. 2009–öд воын томъяс гöтрасисны да кольччисны овны Сюзяыбö. Во олöм бöрти шуисны вуджны Кулöмдiн районö. Овмöдчисны Донын Ирина Васильевналöн ыджыд мам керкаас. Налöн чужис кык пи – Григорий да Игнат. Кык во сайын Ивашев семья ньöбис выль керка, да вуджисны овны Донса кыр йылö. Григорий да Игнат радейтöны ветлыны социокультурнöй шöринö – ворсöны теннисысь, бильярдысь, мачасьöны да гажаа коллялöны прöст кад.

Талун Василий Васильевичлöн вермытöмлун серти коймöд уджалан группа. Сiдзкö, сылы позьö уджавны и öти кинас. Уджысь оз лэччысь. Батьыс фермер да ичöтдырсянь эз пöвадитлы, пыр уджöдiс витнан челядьсö. Гожöмнас Василий ветлö чужан грездас, кайлö батьыскöд кыйсьыны да аддзысьлыны рöдвужкöд. Донын тшöтш ветлö семьяыскöд кыйсьыны Донтыö да вотчыны паськыд парманюръяс костöд. Василий Васильевич ловнас оз усь. Зiль морт, пыр кыпыд лола, ыджыд тöжда аслас семья вöсна. Чайтсьö, татшöмöн жö лоасны и челядьыс.
Наталья Тимушева.
Снимок Артур Гарновлöн.