Улыс Вочын чужлöм ныв, Евдокия Карповна Касева война кад йылысь висьтавлiс:
«Ме чужи 1928–öд воын уна челядя крестьянин семьяын. Вит чоя-вока отсасим бать-мамлы и горт гöгöр уджын, и му вылын, и тракторъяслы пес заптöмын.
Меным вöлi 13 арöс, кор пансис война. Мужикуловтö нуисны ыджыд тышö. Колисны аньяс, челядь да пöрысьулов. Вот на вылö и öшйис став сьöкыд уджыс. Менö, 16 арöса нылöс, индiсны бригадирö. Сiдзкö, ме вылö кутiсны лача. Збыльысь, уджыс кывкутана да сьöкыд. Колö кужны котыртны быдлунся удж, пасъявны норма тыртöм, трудодень урчитöм, кодöскö ошкöм-кулитöм… Трудоденьысь вештысисны няньöн либö сьöмöн.
Колхозын мырсисны эз сöмын колхозникъяс, но и велöдысьяс, вузасьысьяс, клубын, библиотекаын уджалысьяс.
И вöр пöрöдiм, и заптiм тöв кежлö пес да скöтлы турун. Гöрим-кöдзим, идралiм воöм урожай.
Унаöн тшыгъялöмысь кулiсны. Юасьтöг эз лэдзны ветлыны вöрö вотöстшакла. Кывзысьтöмъяслысь мырддявлiсны вотöмтортö. Колiс вöчны помавтöм удж. Гусьöн мöслы пуктам турун, ветлам вотчыны вöрö. Олöмыд олöм и эм.
Вайöм тракторъяс вылын пукалöны том нывъяс, кодъяс велöдчисны курсъясын. Сяммöны тай, майбыр! Сэки пыдди пуктiсны трактористъястö. Кужисны веськöдлыны и ГАЗ и КТЗ вылын. Ёна кокньöдiсны крестьянинлысь удж. 1945–öд воын помасис война. Воисны салдатъяс и пыр жö кутчысисны колхоз уджад. Миянлы, дерт, челядьлы лоис кокни. И надзöн кутiс ладмыны олöмыс».

Мария Андреевна Касева войнадырся олöм йылысь висьтавлiс тадз:
«Чужи ме Улыс Вочын 1924–öд воын крестьянин семьяын. Куим класс и помалi: лоис нажöвитчыны нянь вылад то кага видзöмöн, то колхозын отсасьöмöн. Война пансис. Мужикуловыд мунiсны дорйыны Рöдина. Тракторъяс колисны кöзяинтöмöсь. Кулöмдiнын воссисны курсъяс. Татчö ме и мöдöдчи зон-нывъяскöд велöдчыны трактористад. Том йöзкöд вои чужан сиктö. Пуксьöдiсны ГАЗ трактор вылö, кодi уджалiс пес вылын. 5 сантиметра кузьта пескыд ыджыд ящикад пыр вöлi дась. Тайö уджсö вöчисны, дерт, ыджыдджык челядь. Сэсся пуксьöдiсны КТЗ-ö вылö, кодi уджалiс нин карасин вылын. Уджалiм сменаöн 6 час асывсянь 6 час рытöдз. Трактористъяслöн бригадаö пырисны Василий Иванович Морохин, Фёдор Иванович Касев, Дмитрий Васильевич, Анна Ивановна Морохина и ме. Мырсим «Всё для фронта, всё для Победы!» лозунг улö, венiм сьöкыд, тшыгъялiм, ас ног дорим Победа.
Ме трактор вылын уджалi 14 во. 1945–öд воын меным тырис 21 арöс. Салдатъяс эськö воисны чужанiнö, но миян отсöг вель на ковмис. Пасйылiсны бур уджысь и грамотаясöн, дона козинöн».
Валентина Ширяева.
Снимокъяс гижысьлöн чукöртöмысь.