Григорий Денисович, тадзи позьö ыдждöдлыны Кулöмдiнса шöр школаын велöдчысь, сöмын на öкмысöд классö пырысь Гриша Савельевöс. Торъя военнöй операцияö пырöдчысь салдатъяслы гуманитарнöй отсöг чукöртöмысь, Победа матыстöмö ыджыд пай пуктöмысь, зонкаöс пасйисны «За честь и верность» морöсвывса крестöн.

Григорийлöн уна тöдса да рöдвуж водзсасьöны неонацистъяскöд торъя военнöй операцияын. Бура ёртасьö салдатъяскöд, сёрнитö шойччöг вылö кад кежлö волысьяскöд. Позьö шуны, бура тöдö ёся сулалан могъяснысö тыш мунан нырысь. Сьöлöмсяньыс кöсйö отсавны Айму дорйысьяслы.

Мый вермас вöчны 14 арöса зонка? Сöмын водзмöстчыны тылын, гортас, колана уджö ышöдны ёртъяссö да матыссаяссö.
Григорий Савельев матö во сайö нин нырччö тайö туйвизьын. Зiльö «Караван Волонтёров Z» котырын, кöнi и Ольга Егоровна Шахова рöдвужыс да ышöдiс и зонкаöс. Воча чой-вокъяскöд да тьöткаяскöд чукöртö, весалö, мыськалö куш дозъяс, вундалö картон да кисьталö окопса сисьяс. Вöчасьны коланасö судзöдö öтуввезйысь. Нывкаяс кыöны сойкытшъяс (браслет), артмö аслыссяма видзöг (оберег). Гырысьджыкъяскöд орччöн серпасасьö да гижö письмöяс и Гришалöн ичöт вокыс, тшöтш жö пуктö пай Победа матыстöмö.
– Пиöс тöдöны уна часьтын, ёртасьö и «Малой» позывнöя салдаткöд. Бур, мый ассьыс вын-эбöссö пуктö бур вöчöмö, оз сетчы лёкö. Гришалöн девизыс – «Отсöгнад оз ошйысьлыны». Быд тöлысь пиöйлы чуктöда сьöм, кодöс вермö видзны ас кöсйöм сертиыс. А Гриша чöжис да ыстiс миян районса салдатъяслöн часьтö, – висьталiс Григорийлöн Валентина Афанасьевна Мингалёва мамыс.

Григорий Савельев ёна отсасьö и гортас. Прöст кадö ветлöдлö футболысь ворсысьяслöн секцияö, йöктыны челядьлысь енби сöвмöдан районса керкаö, бура велöдчö. Зонка кöсйö лоны военнöйöн. Таво видлiс пырны Суворов нима училищеö, но эз мойви.
Григорий Денисович Савельевлöн ставыс на артмас, водзö кутас отсасьны, бурас ышöдны и мукöдöс.
Татьяна Чувьюрова.
Снимокъяс Валентина Мингалёвалöн да öтуввезйысь.