Туристъяслöн ордымъясöд

[ A+ ] /[ A- ]

Республикаын ыджыд воськовъясöн сöвмö история туялöм, музейяс да туристъяслöн ордым. Мöд муö петавтöг позьö тöдмавны-аддзыны аслад синъясöн озыр Коми парма, лöня визувтысь да ызгысь юяс, сикт-грездса аслыспöлöс олöм, нималана йöзöс да уна мукöдтор. Талун туриставны позянлун ёна паськыд. Верман воöдчыны быд пельöсö. Туристъясöс колана туйöд нуöдысь-отсасьысьö и велöдчö том ныв Анна Филипповна Игнатова.

9 классöдз велöдчис Дереваннöйса школаын, таво коймöд во нин босьтö тöдöмлунъяс Сыктывкарса А.А.Куратов нима гуманитарнöй педколледжлöн «Туризм» юкöнын.

Ичöтсянь пырöдчис быдсяма конкурсö. Юркарын велöдчигöн колледжсяньыс «Отечество — Земля Коми» конкурсын тöдмöдiс миян районын туристъяслöн ордымöн да лоис медводдзаöн. Петкöдчис и республика тшупöдын, босьтiс мöд места.

Ветлывлö нин практика вылö туристъяслöн агентствоö, библиотекаын челядьлы нуöдö аддзысьлöмъяс, челядь керкаысь нывка да зонкаясöс тöдмöдö республикалöн озырлунöн. Велöдö англия да франция кывъяс.

Колледж помалöм бöрын ныв мöвпалö босьтны и вылыс тшупöда тöдöмлунъяс да водзö уджавны йöзкöд.

Прöст кадö нывъёртъяскöд колледжын ворсöны волейболысь, рытъяснас петавлöны нимкодясьны мича юркарöн.

Кольöм вося гожöмын каникулъяс дырйи кольччис уджавны Сыктывкарö. Удждон вылас ньöбис гыж мичмöдны оборудование. Кöсйö онлайн пыр босьтны и тайö специальносьтсö.

Оз вунöд и школаса велöдчан кад. Гортö быд волiгöн пыравлö да сёрнитö вöвлöм велöдысьяскöд. Окотапырысь отсасьö мамыслы. Анналöн мамыс велöдö история да обществознание, нöшта челядьлы нуöдö быдсяма гажъяс да аддзысьлöмъяс. Тыдалö, мамыслöн водзмöстчöмыс, зiльöмыс да йöз дорö сибыдлуныс вуджис и нылыслы.
Татьяна Чувьюрова.
Снимок Анна Игнатовалöн.

Комментарии:

Добавить комментарий

Свежий выпуск: 7 февраля

Осторожно — мошенники!