Бöръя лунъясö зэрис, кöнсюрö весиг гымалiс. Юяс лöзöдiсны нин, йи тöдчымöн вöснялiс. Неминучаысь видзöм могысь юяс да тыяс вылö петалöны ичöт суднояс государственнöй инспекциялöн районса юкöнын уджалысьяс.

 — Быд вежон видзöдам-öлöдам чери кыйысьясöс, сёрнитам йи вылын урчитöмторъяс йылысь, разöдам казьтылана гижöдъяс. Ёнджыкасö петавлам Кулöм ю вылö, öнi сэнi кыйсьöны тшöкыдджыка, волывлöны весиг семьяясöн. Сэнi йиыс 30 сантиметра кызта. Но колö кутны тöд вылын, тулысын то кынмалö, то сылö. Йи вылын лымйыс рöшкыд, воштö чорыдлунсö, — висьталiс старшöй госинспектор Иван Борисович Попов.

 Госинспекторъяс тшöкыда сёрнитöны и велöдчысьяскöд. Öлöдöны, мый оз позь петны йи вылö бать-мамтöг, зэригöн либö пемыдын ворсны юысь матын, оз позь чеччавны-поткöдлыны йи. Ю дорысыс кö вазис нин, сувтны сэтчö öпаснö.

 Гырысьяслы тöд вылö. Öтлаын уна мортöн мунiгöн колö кутчысьны öта-мöдысь костöн. Эм кö ноп, сiйöс колö öшöдны öти пельпом выланыд, тадзи позяс öдйö мездысьны, тшук кö кок уланыд чуктас йиыс. Оз ков шöйöвошны. Бузгысинныд нин кö кöдзыд йиа ваö, пыксьöй гырддзананыд, а тушанад водöй да надзöникöн öти коктö лэптöй йи вылö, а сэсся артмас лэптыны и мöдсö. Оз позь дзик пыр сувтны кок вылö, колö бергалöмöн кыссьыны водзö. Горзыны, корны отсöг. Берегын нин пöрччыны да ёна пыдзыртны кöтасьöм кöлуй.

 Казялiнныд кö, мый йи вылын кодкö веськалiс неминучаö, пыр жö колö горöдны, мый локтанныд отсöгöн. Босьтны кузь бедь, кöв, пöрччыны шарп либö тасма, да водöмöн надзöникöн кыссьыны вöйысьлань. Матыстчыны ёна оз позь, вöсни йи вермас чуктыны да кыскыны асьнытö.

 Сюся видзöй челядьнытö, торйöн нин урокъяс бöрся да шойччан лунъясö. Юасьöй, кытчö мунiс öтнас либö ёртъясыскöд. Öлöдöй, мед оз мунны ва дорö. Тöдöй — тулысыд ылöдчысь!

Суас кö неминуча, звöнитöй «101» либö «112» телефонъясö.
 Татьяна Чувьюрова.
 Снимок Валентина Самариналöн.