Кулöмдiнса шöр бурдöдчанiнö локтiс том терапевт Анастасия Олеговна Мартюшева. Ачыс Помöсдiнысь. Сöмын на помалiс Кировса медицина университет. Весиг шойччыштнысö на эз удит.
— Ме дзоля дырйи радейтi ворсны аканьöн, барбиöн — бурдöдысьлöн паськöма, еджыд халата, гöрд сапожкияса, — казьтывлiс том бурдöдысь. — Сэкисянь нин мöвпалi, ачымöс аддзи сылöн кодь жö паськöмаöн да кöмöн. Да и примерыс пыр вöлi син водзын: менам вежань, Наталья Александровна Опарина танi со дыр нин зiльö терапевтöн жö. Гуся мöвпöс пыр кутi сьöлöмын. Школа бöрын тöдi нин, мый лоа бурдöдысьöн. Кулöмдiнса шöр бурдöдчанiнсянь ыстöмöн университетын велöдчи квайт во, лои участокса терапевтöн. Кöсйöмöй збыльмис: со уджала еджыд халатöн, сöмын гöрд сапожкитöг, гашкö, коркö и лоас на, — нюммунöмöн эскöдiс сiйö.
Анастасия Олеговна велöдчигкостiыс вевъялiс на уджавны сэтчöс хирургия, а сэсся и тэрыб отсöг сетан юкöнъясын. Öти ног кö, тайö бур, öд велöдчöм да сыкöд йитчöм удж нöшта на содтiсны сям. Но сэкжö эз позь кольччыны велöдчöмысь. Овлiс, ковмылiс бöрыннас суöдны астшöтшъяяссö.
Юрсиктын уджавны босьтчöмсянь пыр жö паныдасисны сьöкыдлунъяс: медсестраяс тырмытöмла лоö зiльны öтнаслы. Но тайö сiйöс эз повзьöд, öд велöдчигас уджалiгöн тöдлiс став сьöкыдсö нин, узьтöм войяссö весиг. Кыпыд сьöлöмöн вочаалö висьысьясöс, видлалö, юасьö, медым стöча тöдмавны, мыйöн майшасьöны да индыны колана бурдöдчöм. Йöзöс примитöмысь кындзи сьöкыда нёрпалысьяс дорö ветлывлö гортöдзныс. Коркö подöн, а ылынöсь кö, машинаöн.
— Гожöмын, дерт, велöдчöм бöрын колiс шойччыны, но ог жалит, мый пыри уджавны. Участокса терапевтлöн уджыс кöть сьöкыд, но аслыспöлöс интереснöй, лунысь лунö аслыд босьтан мыйкö нöшта выльтор, содтан сям, — висьталiс том специалист.
Анастасия Олеговна гожöмын уджыштöм бöрын кöсйö мунны велöдчыны водзö, босьтны бурдöдысьлысь нöшта мöд, акушер-гинекологлысь специальносьт. Таво, висьталö сiйö, буретш Сыктывкарса госуниверситет бердын восьтiсны та кузя юкöн. Велöдчыны колö кык во. И шуис бергöдчыны ас районö, öд бурдöдысьясыд миян танi колöны.
Галина Нестерова.
Снимок гижысьлöн.