Нэм чöж велöдча…

Николай Фёдорович Морохин «Воч» овмöдчöминса юралысь. Кывкутана удж вылын 2004-öд восянь.
— Ме водз петi уджавны. Воч школаын кöкъямыс класс помалöм бöрын öкмысöдö мунi Зимстан школаö. Бокиад велöдчынытö эз сьöлöм серти вöв, да во бöрын мунi юркарса 20-öд номера училищеö. Велöдчи трактористö. Ас тшöтшъяяс парта сайын на пукалiсны, а ме каръерын тракторöн лыа перйи. Недыр мысти корисны АТС-ö монтёрöн, но кад кольыштöм бöрын АТС-сö вуджöдiсны Зимстанö. Ме коли уджтöг. Эг дыр кежлö, корисны лесхозö мастеравны. Сэки и гöгöрвои, мый колö велöдчыны. Рытъя школаын экстернöн помалi 11 класс, сэсся 4 во велöдчи Суводскса вöр техникумын. Лесхозын мастералi 4 во.
Юралысьö индöм бöрын бара на велöдчи – босьтi вылыс тшупöда тöдöмлунъяс вöр институтын, позьö шуны, нэм чöж велöдча, — юксис Николай Фёдорович.
«Воч» овмöдчöмин öтувтö 5 сикт-грезд: Улыс Воч, Вылыс Воч, Дёма, Сотчöмув да Вöль. Бöръя куим грездас лыда олысь сöмын, эз вöв связьлöн йитöд ни туй. Колiгöн он вöлi вермы корны некутшöм отсöг. Вочсаяс кутчысьöны на му-видз бердö, видзöны скöт. Танi абуöсь эновтöм керкаяс, быд во кыпöдöны выльясöс. Медся нин шонтö сьöлöмсö, мый чужысьыс сиктаныс унджык таладорсö эновтысьсьыс.
— Медыджыд могнас, кыдзи сиктса юралысь, ас водзö пуктi туй да связь лöсьöдöм. Талун телефон пыр йитчывны позьö став грездыскöд. Тöлын грездъясö воöдчöм могысь ньöбим «Буран». Вылыс Воч-Улыс Воч-Зимстан туйкостын вöчöма кöрта бетонысь шоръяс вомöн став поссö, увтасiнъясö туй вомöн пуктöма кöрт трубаяс, сöмын кольöм во сюйим 13-öс, — водзö висьталiс Н.Ф.Морохин.
Николай Фёдоровичöс тшöкыда позьö паныдавны юрсиктысь да юркарысь. Могыс уна, да уна кабинетъясын чина йöзкöд колö паныдасьлыны-сёрнитны. Ачыс висьталö, мый мытшöдъяс разьöм могысь медводз сёрнитö колана мортыскöд аддзöдчылöмöн. Оз ставыс дзик пырöн артмы, но зiльö пыр воöдчыны öти кывйö.
Юрсиктсянь ылö пуксьöм сиктад юралысь дорö быдсикас майшöгöн волöны, некодлы он öткажит. Некымын во сайын МЧС-сянь звöнитiсны праздникъяс кадö да юöртiсны, мый 3 морт вöйöны кöнкö ю вылас. Пыр жö петiс пыжöн ва вылö, корсис да отсалiс. Нимкодьыс вöлi аслыс, мый пикö воöмаяс вермисны бергöдчыны гортаныс. А öд ыджыд шог вермис суны налысь матыссаяснысö.
Сиктса мортыд радейтö вöрö петавны. Гортас Галина Анатольевна гöтырыскöд пыр олiсны уна скöтöн, öнi на дзикöдз эз эновтчыны.
Н.Ф.Морохинлысь зiльöмсö район да республика тшупöдын пасйöма уна почёт грамотаöн да ошкана письмööн, на лыдын Госсоветсянь да республикаса юралыссянь. Пасйöма тшöтш «За заслуги перед Республикой Коми» торъя пасöн.
Ольга Васильева.
Снимок гижысьлöн.