Велöдысьяслöн туйöд

Кебанъёльын олысь Ирина Григорьевна Гришиналöн тайö воыс тöдчана сiйöн, мый школаын велöдны босьтчöмсянь тшукис нелямын во. Тайö абу этша. Мыйта челядь мунiс сылöн кияс пыр, мыйта тöждлун да тöдöмлун сетiс налы. Öнi на пиысь унаöн нин асьныс верстьö йöз, туйдöны-кыпöдöны ассьыныс нин быдтаснысö…

— Миян школаын велöдысьяслöн зэв ён котыр, — висьталiс Ирина Григорьевна. — Найö челядьлы сетöны бур да джуджыд тöдöмлунъяс. Оз весьшöрö велöдчысьяс олимпиадаясын, кöть кутшöм тшупöдаын, шедöдны вермöмъяс либö петны медбуръяс лыдö. Та кузя школа районын мунö медводдзаöн. А республикаын медводзын жö медбуръяс лыдö веськалöм кузя. Быд во челядь бура сдайтöны госэкзаменъяс, босьтöны аттестатъяс. Ён тöдöмлунъяснад школа помалысьяс пырöны велöдчыны Россия пасьтаса вылыс тшупöда велöдчанiнъясö — Москваö, Казаньö, Владивостокö, Улыс Новгородö, кодкö врачö, кодкö инженерö ли IT-технология кузя специалистö.

Найö бурöн казьтывлöны ассьыныс велöдысь-туйдысьяссö, аттьöалöны зумыд тöдöмлунъяс сетöмысь, асшöр олöмö петны отсалöмысь. Велöдысьяслы, дерт жö, нимкодь, мый найö аддзисны асьнысö олöманыс. Тшöтш и Ирина Григорьевналы. Öд эмöсь, кöнкö, ныв-зон, кодъяс сы моз жö да мукöд велöдысьяс моз олöмсö йитiсны челядькöд уджкöд. Босьтны кöть Ирина Григорьевналысь пиянсö, Андрейöс да Алексейöс, кодъяс буретш зiльöны зонпосникöд. Андрей Владимирович Кебанъёльса школаын жö велöдö ОБЖ да технология, спорт школасянь нöшта нуöдö баскетбол кузя секция, а Алексей Владимирович Кулöмдiн спорт школаын томуловöс туйдö ворсны футболысь. Артмö, налöн семьяын велöдысьяслöн династиясö эм кодлы нуöдны водзö. Зэв нимкод аньлы пиян вöснаыс. Ирина Григорьевна — уджвывса ветеран. Уна вося бура зiльöмсö пасйисны Россия Федерацияса да мукöд тшупöда почёт грамотаясöн.
Галина Нестерова.
Снимок Ирина Гришиналöн чукöртöмысь.