Казьтылан дзоридзьяс

Тöрыт Кулöмдiнын, 12 час лунын усьöм воинъяслы мемориал дорö пуктiсны ловъя дзоридзьяс районса юралысь — администрацияöн веськöдлысь С.В.Рубан, ветеранъяслöн районса сöветöн юрнуöдысь Е.А.Сазанович, районса администрацияöн веськöдлысьöс вежысь Н.А.Чаланова, районса прокурор Борис Анатольевич Игнатов, Республикаса юралысьлöн общественнöй примитанiнысь районса юкöнын веськöдлысь А.А.Кузнецова, районса администрацияын уджалысьяс, общественникъяс, сиктса олысьяс. Уна во нин колис тайö тышсяньыс, но ми сьöлöмын видзам сiйö тышса геройяс йылысь паметьсö. Сергей Владимирович аслас сёрниын тöдчöдiс, мый Сталинград вöсна тышын юрнысö пуктiсны миллионысь унджык миян салдат. Фашистъяслöн воштöмыс 800 сюрсысь унджык морт. Бурöтш Сталинградса тышын «чегисны фашистъяслысь сюрсасö». Сергей Владимирович торйöн шыöдчис быдмысь войтыр дорö: «Татшöм лоöмторъяссö колö тöдны, оз позь лэдзны вунöдны страналысь историясö».

Талунъя олысьяс некор ог вунöдöй, кутшöм донöн вöлi шедöдöма миянлысь лöнь олöмнымöс.