Елена Ивановна Есева чужис 1928-öд вося июль квайтöд лунö Ичöт Кужйын. Бать-мамыслöн вöлi квайт челядь. Батьыс сизим во тышкасис вöрöгкöд гражданскöй война дырйи, бергöдчис да нэмсö уджалiс колхозын.
Кор пансис немечьяскöд война, Елена Ивановналы вöлi 13 арöс. Казьтылö 1941-öд вося июнь 22-öд лунсö, кор став олысьыс мунiс сиктсöвет дорö, бöрдiсны. Тайö жö лунö военкоматсянь вайисны айловъяслы фронт вылö мунны повесткаяс. Батьыс вöлi арлыда нин, да сiйöс эз босьтны. Семьяысь кö кодкö вöлi война вылын, гортсаясыслы сетлiсны прöдукта вылö карточка. Налöн сiйö эз вöв. Елена Ивановналы ковмис мунны уджавны колхозö, вокыскöд чередöн ветлiсны школаö. Сизим класс и помалiс, да сэсся сiйöс ыстiсны кылöдчанiнö. Вöлi вывтi сьöкыд. Öтчыд путкыльтчис пыжыс, да муртса эз вöй.
Пыр на син водзас Победа лун. Йöз нимкодясисны, йöктiсны-сьылiсны, горзiсны, сэкжö бöрдiсны, öд унаöн эз бергöдчыны, пуктiсны юрнысö вöрöгöд тышын, кодъяскö вошисны туй ни пом.
Эз вöв кокни и война кусöм бöрын. Аньлы пыр вöлi окота пöттöдз сёйны нянь. 1954-öд воын Елена Ивановна петiс верöс сайö, да овмöдчисны Кебанъёльын. Уджалiсны Кужса лесопунктын. Гозъялöн вит челядь. Алексей да Василий уджалöны туй вöчан да дзоньталан Кулöмдiнса юкöнын, Анатолий вермытöм, Иван — районса шöр бурдöдчанiнын врач невропатолог, Валентина агенталö госстрахын. Олöма аньлöн озырлуныс — дас внук да öкмыс правнук. Олö Валентина нылыскöд, овмöсаныс видзöны мöс. Елена Ивановна радейтö бергöдны гортгöгöрса удж, тулыссянь арöдз град вылын, ачыс пуктö капуста, морков, öгурцы да мукöдтор. Ачыс жö на пусьö-пöжасьö, пöся вочаалö гöсьтъясöс.
Мукöд челядьыс олöны орччöн, пыр кежавлöны муса мам дорö. Оз вунöдны и внукъясыс, волöны быд гожöмын. Керкаыс пыр уна йöза. Аслас чоя-вок пиысь ловъя 82 арöса Борис Иванович Кузнецов вокыс, кодi олö Ичöт Кужйын.
Уна вося бур уджысь Елена Ивановнаöс пасйисны юбилейнöй медальясöн, уна кага чужтöмысь мöд тшупöда Материнство медальöн, почёт грамотаясöн да аттьöалан гижöдъясöн.
Нина Плескач,олöмаяслöн Кебанъёльса котырöн юрнуöдысь.
Снимок гижысьлöн.