Ставыс на син водзас

[ A+ ] /[ A- ]


1941-öд вося июнь 22-öд лунö асывнас Гитлер уськöдчис миян страна вылö. Нёль во кыссьысь ыджыд да вир кисьтана война ыджыд шог вайис матö быд семьяö, тшöтш и Донын олысь Елена Александровна Тимушевалы, кодлы талун 86 арöс. Лыддьысьö война кадся челядьöн.

Война пансигöн олiс Ручын. Град вылын ставыс нин вöлi пуктöма. И найö мамыскöд, Марфа Михайловна Есевакöд, мöдöдчисны «Бородино» пароходöн Сыктывкарö вежань дорас. Ю кузя колiс мунны кык сутки. Воöмöн да чеччöм бöрын аддзисны, мый пристаньын дзик ставöн бöрдöны. Ичöт Лена повзис, бöр пö мунам гортö. Вöлöмкö, заводитчис ыджыд война. Мамыс вочавидзис, мый вежань дорын узьöм бöрын бергöдчасны гортас.

Ручын, кыдзи и страна пасьтала, нёль во чöж вöлi сьöкыд олöм. Ичöт Леналысь бать-мамсö мöдöдiсны Улыс Куръяö пöрöдны вöр. Александр Алексеевич Есев батьыс медводдза война дырйи ёна ранитчылiс, да мöд война вылö эз нин босьтны. Война чöж найö уджалiсны — заптicны вöр да зiлисны колхозын.

Тшыгъялöмысь дорйис нянь да картупель. Некöн вöлi он аддзы, медым туплясис нянь. Верстьö йöзлы луннас сетлiсны 200, а челядьлы 100 грамм. Мöс видзысьяслы колiс йöвсö сдайтны государстволы, а гортас босьтны сöмын обрат. Став вöвсö нуисны война вылö. Колис öти машина. Пестö йöзыс асьныс кыскалiсны даддьöн. Нёльöд класс бöрын школаын велöдчысьяс мунiсны уджавны. Дереваннöй да Руч сиктсаяс öтлаасисны да котыртiсны «Кустпром», кöнi сёйысь вöчавлiсны пöсуда, кучикысь кöм, тшöтш гынсапöг.

Елена Александровналöн Иван Андреевич Тимушев верöсыс Донысь. Быдтiсны квайт челядьöс. Висьтавлiс гöтырыслы Донын татшöм лоöмтор йылысь. Сылöн Гриша Анна пöчыс челядьöс век мыйöнкö вердлiс да юктавлiс. Тшай дорö сакар пыдди сетлiс чеснок пинь. Иванлöн пöчыс мусö гöрлiс мöснас. Гöрсö пысалöм бöрын пö сiйö пидзöссяньыс юрбитлiс мöскыслы да бöрдлiс. И сюрукыдлöн тшöтш петлiс синва. Яндзим нин вöлi уджалысь мöслысь корны йöв. Уджöдöм бöрад сэсся йöвтö этшаджык и сетлiс. Война панасын Донысь уна мужичöйöс босьтiсны тышкасьны вöрöгкöд. Сэки механикöн вöлi Алексей Иванович Нестеров. Сiйö велöдiс аньясöс да нывбабаясöс уджавны тракторöн. Сиктъяс костын вöлiны урожай чукöртöм кузя ордйысьöмъяс. Сэки панйис донсаяслöн «Вермасьöм» колхоз. Нывбабаяс уджавлiсны мужичöйясысь эз омöльджыка.

Елена Александровна Победа паныдалiс сизим арöсын Еляёльын. Кузöбъю кузя вöлi вöр заптан сизим посёлок — кык Слуда, Сьöвкым, Вань, Еляёль, Стакöй, Изъяёль. Челядь вöлiсны пöлатьын, кор рация пыр юöртiсны Победа йылысь. Ставöн кутiсны нимкодясьны, кутчысьлiсны, кодкö бöрдiс, кодкö сьылiс-йöктiс, ворсiсны гудöкöн да балалайкаöн. Май 9-öд лунö вöлi пидзöсöдз лым да шондiа поводдя. И тайö некор оз вун.

Тöвбыд олöма морт нылыскöд олö Донын, а гожöм кежлас ветлö аслас керкаö Паспомö. Восьса да шань сьöлöма нывбабалы век эм мыйöн юксьыны йöзкöд.

Елена Александровна сиö налы, кодъяс тöдлiсны ыджыд войналысь сир курыд кöрсö, сьöкыд олöмсö да кодъяс колисны этшаöн нин, овны-вывны на, мед найöс матыссаясныс кытшалiсны ыджыд тöждöн.
Наталья Тимушева.
Снимокъяс Елена Тимушевалöн чукöртöмысь.

Комментарии:

Добавить комментарий

Свежий выпуск: 20 июня

Осторожно — мошенники!