Талун районын 20 ломтысянiн. Тайö тöвнас öкмысыс кутас ломтысьны пескöн, куим — из шомйöн, квайт — брикетöн, öти — пеллетöн да öти – мазутöн.

Быд во помын «Шоныд сетан Коми компания» котырлöн Кулöмдiнса юкöн урчитö гожöм кежлö дзоньтасян уджъяс. 2019-2020-öд воясö куим ломтысянiнын вежисны пöрт – кыкöс Кебанъёльын да öтиöс Керчомъяын. Та кындзи инвестицияа программа серти школа кыпöдöмкöд йитöдын куим выль пöрт пуктiсны Помöсдiнын.
Вежисны важмöм 792 метра шоныд мунан трубаяс, 975 метра ва визь. Унджык уджъяс вöчисны Лопъювад, Дiасёръя, Озъяг, Кулöмдiн, Югыдъяг да Улыс Воч овмöдчöминъясын. Талун кежлö лöсьöдiсны матö ставсö, сигöртасны сентябрын. Ва весалан станцияяс уджалöны Дон, Дереваннöй, Руч, Лöгинъяг да Паспомын, таво вöчисны Зимстан да Ярашъюын.

Сёрнитны кö мытшöдъяс йылысь, юкöнöн веськöдлысь Виктор Владимирович Воробьёвлöн висьталöм серти 8 миллион сайö шайт уджйöз вештыны вермытöмла лунвыв электрическöй сетьяслöн районса юкöн июньсянь биысь орöдiс став ломтысянiнсö. Сёрнитчисны да тöв кежлö дасьтысян ыджыд уджъяс вöчигöн биöн век жö могмöдicны. Трубаяс вежлалiгöн «Шоныд сетан Коми компаниялöн» Кулöмдiнса юкöн вöчасис аслас дизеля станцияяс отсöгöн.
Ломтысянiнъясöс пескöн могмöдöны Помöсдiнысь «Оптима Лес», Керчомъяысь «КВМ», Югыдъягысь «Тайга» котыръяс, асшöр уджалысьяс Н.П. Чаплыгин, А.В.Третьяков, С.В.Мастюгин, С.А.Повышев. Мазутöн могмöдöны Кировысь «Транснефтеком», из шомöн – «Русский уголь» котыръяс, брикетöн да пеллетöн асшöр уджалысь В.В.Белый. Брикетъяс да пеллет вайöны водзвыв тöлысь, пес да из шом — некымын тöлысь кежлö водзвыв, мазут – коставлытöг. Сьöкыдлунъяс овлöны тулысын ытва дырйи, кор сиптысьöны туйяс.
Квайт гöгöр миллион шайт уджйöзаöсь олысьяс. Накöд медводз сёрнитöны, а сэсся оз кö вештысьны, водзö уджалö суд приставъяс юкöн. В.В. Воробьевлöн кывъяс серти, миян районын уна патераа керкаясöн абу ни öти веськöдлан котыр. Та вöсна сэнi олысьяслы колö аслыныс котыртны оланiн фонд. Патера кутысьяслы аслыныс колö шыöдчыны юкöнö шоныд мунан трубаясысь ва весалöм могысь, дасьтыны тöв кежлö öтувъя пыранiн да вевт. Мед эз ло сiдз, мый керкаö воö шоныд, а абу либö оз сиптысь ывла öдзöс, жугласьöм öшиньяс. Та кындзи колö бура тöдны оланiн кодексысь öтув эмбур кутöм кузя юкöн.
Кыдзи и быд во, шоныд сетасны сентябрын да поводдя вылö видзöдöмöн. Медводз школа-садъясö, бурдöдчанiнъясö.
Артур Гарнов.
Снимокъяс «Шоныд сетан Коми компания» котырлöн Кулöмдiнса юкöнлöн
чукöртöмысь.