Став семьяöн

[ A+ ] /[ A- ]

«Босьтчысь фермер» да «Семьяöн сöвмöдан ферма» конкурсъяслöн, кöнi вермис крестьянин овмöс кутысь Мысысь Евгения Александровна Кузнецова, нимыс стöча лöсялö сылöн шуда позлы да быдмысь челядьлы.

13 арöса Илья таво батьыскöд пуктысис нин, водз чеччöмöн петалiс муяс вылö. Ачыс нин куртiс турун, а Иван Михайлович батьыс топöдiс ытшкöм-косьмöмсö. 11 арöса Валерия бать-мам уджалiгкосттi и пусьö, и пелькöдчö гортын, колiгöн видзö дзоля воксö. 9 арöса Миша пастукалö, а куим арöса Ярослав дöзьöритö чипанъясöс. Позьö смела шуны, найö аскиа фермеръяс нин, бать-мамкöд öтув семьяöн сöвмöдöны крестьянин овмöс.

Тöв кежлö дасьтiсны 150 тонна турун, босьтiсны 10 тонна картупель. Кöдздöдöмöн да лым усьöмöн сюрукъяс пырасны югыд да ыджыд скöт картаö. Шоныд да мича арся лунъясö йирсьöны на. Выльлаын таво тöвъясны мöд во нин. Тайö ангар сяма фермасö кыпöдiс «Семьяöн сöвмöдан ферма» конкурсын вермöмысь шедöдöм сьöм вылö. Кыкысь отсöг вичмис «Монди СЛПК» акционер котыркöд ёртасьöм йылысь сёрнитчöм серти, ставнас 2,5 миллион шайт.

Пасъям, 2016-öд воын Евгения Александровна крестьянин овмöс кутны босьтчигöн вöлi медся томъяс лыдын. Эз бара-й повзьы, воськов бöрся воськов сöвмис-паськöдчис. Медводз асшöр удж восьтöм балаöн вермис районса конкурсын. Овмöсаныс вöлi нин мöс, кукань да öш, трактор, да вичмöдöм сьöм вылас ньöбисны гöр, культиватор, кык мöс, асланыс сьöм вылö трактор да кык машина. Иван Михайлович верöсыс кыпöдлiс öти, скöт юр лыд содтöмöн мöд карта, бöръясö паськöдыштiс. Но бара эз кутны тöрны. Со и пырöдчис 50 юрлы ферма кыпöдöм кузя конкурсö. Кольöм воын пырисны нин выльлаö.

— Уджным ёна кокняммис. Куйöд ог нин ки помысь весалöй-петкöдöй, уджалö транспортёр, чукöртам ывла вылын сулалысь доддьö, сэсся нуам асланым муяс вылö. Провод кузя быд мöслы воö ва, провод кузя жö торъя жырйö, кöнi менам сепаратор да вый вöчан, мунö йöв. Йöв вöчöм вылö эм сертификат, да вузавла матiгöгöрса сикт-посёлокъясö, ваяла Кулöмдiнö, унаöн лэдзчысисны скöт видзöмысь, да инала тшöтш и асланым Мысын. Сдайта «Усть-Куломская МТС» кооперативö, кытчö пыра и ачым. Сертификат босьтöм могысь кöсъя лабораторияö ыстыны рысь да вый, мед тшöтш инавны тайö вöлöгасö. Фермаын нöшта эм жыр лысьтысьысьяслы, кöнi найö вежöны уджалан паськöм. Талун танi уджалöны кык лысьтысьысь да скöтник. Миян «кантораным» орччöн, брусысь лэптöм, — сёрнитiс Евгения Александровна.

Овмöсын 39 скöт юр, 13 лысьтан мöс, кук да ялавичьяс. Кольöм воын «Пезмöг» овмöсысь ньöбисны 8 кукöс, найö таво тырсялiсны, локтан воын вайсясны. Таво «Пригороднöй» овмöсысь босьтiсны öшкöс.
Эм видз-му овмöс матö став техникаыс. Таво пуктiсны 2,5 гектар картупель, но кöть эм картупель босьтаныс, но идравны оз тырмы йöзыс, да августын öти мортлысь ньöбисны комбайн. Сентябр панасын куим лунöн и керисны. Техника вылын нёль морт бöрйисны, шыблалiсны му да изъяс. Нöшта на и техника бöрся мунiсны, чукöртiсны кольöмсö. Отсасисны рöдвуж, медавлiсны и сиктсаясöс. Таво пö ёна сiсьмö. Бара на медалiс йöзöс, бöрйöны, торйöдöны кöйдыс, гырысь да посни вылö. Кольöм воын кöйдыс вылö кольöдлiсны вит тонна, пуктысигöн сеталiсны и сиктсаяс. «Мöд няньöн» могмöдö орчча сикт-посёлоксаясöс, Югыдъягö корисны нин 20 мешöк. Поснинас вердöны скöтсö.

— Зэв бур, мый уджалöны программаяс, сьöма отсöг вичмö и «Монди СЛПК» акционер котырсянь. Кыдз эськö асьным бергöдчим? Программаясö пырöдчöмöн да ыджыд вöр овмöслöн отсöгöн и сöвмам, паськöдчам водзö, вöлöгаöн могмöдам сикт-посёлоксаясöс, йöзöс — уджöн, — тöдчöдiс Евгения Александровна.
Марина Дадашова.
Снимокъяс Евгения Кузнецовалöн.

Комментарии:

Добавить комментарий

Свежий выпуск: 15 февраля

https://www.gosuslugi.ru/help/faq/mobile_election/2100910

Осторожно — мошенники!