Муна сикт кузя – быд керка дорын мыйкö да мыйкö вöчöны. Öтилаын пес поткöдлöны, а мöдлаын со хлыстöн вайöмаöсь и лöсьöдчöны пилитны. А кодъяскö тэчöны нин, со ывлаыс кутшöм шоныд да мича, гортад оз пырсьы. Керка да загунъяс вылысь весалöны лым, тшöтш и пес сарайяс прöстмöдöны. Кодсюрö вешталöны керка гöгöр тöвбыдся чукöртöм лым. Он и тöдлы, гöбöчад гузьöбтас-пырас ваыд, а сэнi öд картупель, и сёйöм, и кöйдыс вылö.

Со лямпа туй, дерт, вадорöдз кодкö мунöма понйыскöд. Вöла-доддя мунiс, град вылас нуö куйöд. Öнi эськö уна нин кöрт вöвыд, мотоблокъяснад новлöны, но сикт кузяыд рöдтысь вöвтö шочиника аддзывлан на. Кöть оз унаöн, а видзöны на. Вöрладорсянь кылiс буран, кыйсьыны кодъяскö, тыдалö, мунöны. Челядь зiля кайöны кыр вылö исласьны дадьясöн да ватрушкаясöн. Ставныс банйöмаöсь, сералöны, усьöны-чеччöны, теш да и гаж налы.
Кöзяйкаяслöн öшинь вылад рöсада нин чепöсйöма, дерт, кöнкö переч да помидор, найöс öд водз пуктöны.
Со лым вылас шыбитöмаöсь палас да джодждöра, пелькöдöны, тыдалö, керка пытшсö. Уналöн пылесосыд эм, а кор ывласьыд пыртан – ывла кöра, керкаыд весиг серöктö.

Тöв кöть гожöм, ар кöть тулыс сиктад уджыд оз бырлы. А нöшта арнас, кор ставсö меститам му вывсьыд, помасяс вотчöм, кöдздöдас, кынмалö. Со мися, сэсся тöвбыд шойччам, сёрнитам ас костын. Но он тай, уджыс бара петас юр вывтырыд. Зато гажтöм оз босьт, век öтув чукöртчылiг эм мый йылысь сёрнитны.
Екатерина Ульнырова.
Снимокъяс гижысьлöн.