Районын эз нин кольны Великöй Отечественнöй войнаын вöрöгкöд тышкасьысьяс. Ловъяöсь сöмын тылын уджалысьяс да войнадырся челядь. Талун колö видзны найöс, и юасьны олöм йылысь, медым эз вун сiйö кадыс, кор дорисны Победа да ыджыд уджöн выльысь ловзьöдiсны да кыпöдiсны странанымöс. Джеджим грездын эм война кадся челядьдыра кык морт.

Öтиыс на пиысь Григорий Евгеньевич Тарабукин, кодi чужис стöч война заводитчан кадö, 1941–öд воын. Дерт, эз вöв кокньыд.
Батьыс вöлiс война вылын. Удитiс на сылы воны письмö, кöнi юöртiсны пи чужöм йылысь. Сiйö вöлi военнöйöн, дыр служитiс армияын. Пырöдчылiс и финнъяскöд войнаö. Гортас локтiс и лоис стрелокöн, видзис пукалысьясöс. Нуисны Княжпогост районса Вожаёльö. Сэсся батьыс мунiс Великöй Отечественнöй война вылö. Кад мысти мамыслы воис гижöд, мый верöсыс вошис туй ни пом. Григорийлöн мамыс 26 арöсын колис дöваöн. Верöс сайö сэсся эз и петавлы. Видзис-быдтiс челядьöс. Морт нэмыс олiс Джеджимын. Мортö вайöдiс кыкнан челядьсö – Григорийöс да Екатеринаöс. Велöдчылiсны и Донын, и Кулöмдiнын. Мамыс вöлi ёнöн да збойöн. Бергöдлiс став айлов уджсö. Велöдiс писö вöдитчыны черöн да косаöн, лэчтасьны, тöв кежлö заптыны турун. Война кадö и сы бöрын кузь лунтыр колiс уджавны и ыджыдъяслы, и челядьлы. Кыдзи юксис ачыс Григорий Евгеньевич, лызьнад да чернад чужлiм. Тадзи пö шулiсны комиясыд.

Талун Григорий Евгеньевич олö Анна Емельяновна гöтырыскöд. Ачыс унджык кадсö уджалiс школаын велöдысьöн. Ёна радейтiс кыйсьыны, петавны вöр-ваö. Джеджимса музейын уджалысьяс пыр шыöдчылiсны сы дорö. Мужичöй бура тöдö история. Отсалiс и краеведение, и топонимика кузя. Джеджим гöгöрса вöр-валысь зэв бура тöдö став нимсö.
Ичöт грездын кыпыда кутасны пасйыны Победа лун – ставöн сьыласны комиöн «Победа лун», мунасны велосипедъясöн, лоас кыпыд гаж, пуасны рок, и, дерт жö, казьтывласны найöс, кодъяс тышкасьлiсны да уджавлiсны война кадö.
Аттьö материал дасьтыны отсалöмысь Зоя Степановна да Надежда Николаевна Напалковаяслы.
Наталья Тимушева.
Снимок Тамара Напалковалöн.