Сьöлöмнас век на пионер

— Пионеръяскöд удж пыр вöлi и колис менам сьöлöмын, сiйö менам олöмöй и гажöй, — пöся тöдчöдiс Вера Вячеславовна Потоцкая, Кужйысь петöм ань, кодi матö 45 во сетiс челядьöс туйдöм-велöдöмлы. Тайö кадсьыс медся нин казьтывланаöн колис пионеръяскöд удж, кодi озырмöдiс сылысь олöмсö медся кыпыд, гажа да шуда здукъясöн.

Челядь дорö сибыдлуныс да на пöвстын нырщикалöмыс, кыдз ачыс шуис, сылöн тыдалiс нин садсяньыс: сэкся визув нывка пыр зiлис гажöдны ас тшöтшъяяссö, ворсöдiс быд ногыс. А сэсся водзмöстчис и школаын. Сiйöс помалöм бöрын пырис И.А.Куратов нима Сыктывкарса педучилищеö, зэв ёна кöсйис велöдчыны пионервожатöйö, но сiйö юкöнас пырны эзджык тырмы баллыс. И лоис ичöт классъяс велöдысьöн. Ёна эськö видзöдiс, кыдзи мöд юкöнса студентъяс ветлöдлiсны гöрд галстукаöсь, чукöртчывлiсны сборъяс вылö. Но олöмад, кыдз шуласны, быдтор овлö ас кадö. Тшöтш и лоысь велöдысьлöн ставыс на вöлi водзын. Медводз сетiс тöдöмлун Пожöг школаса нывкаяслы да зонкаяслы, öти сайын ас кöсйöмöн уджалiс и пионеръяскöд. А сэсся мöдöдiсны Кулöмдiнса школаö, кöнi индiсны пионервожатöйöн. Вера Вячеславовналöн лолыс шудлунöн пуис: сэнi пионеръяслöн вöлi торъя жыр, став коланаыс — барабанъяс, горнъяс, отрядъяслöн флагъяс. Сöмын уджав. Школаын олöмыс пуöмöн-пуис: пионеръяслöн сборъяс, слётъяс, бумаг-пöим чукöртöм, мукöд общественнöй уджъяс бергöдöм. Быдмысь ныв-зонмöс туйдöмöн, накöд öтув восьлалöмöн Вера Вячеславовна ачыс тшöтш велöдчис да вочасöн пырöдчис пионеръяслöн уджö.

— Пионеръяслöн жыр пыр вöлi челядьöн тыр, — казьтывлiс сiйö. — Кодъяскö ворсiсны шашки-шахматöн, кодъяскö серпасасисны либö сьылiсны-ворсiсны. Быдöн аддзис сьöлöм сертиыс удж. Но медся нин казьтыланаöн колис май 19-öд лунö, пионеръяс котырлöн чужан лунö, автобусöн ветлöм. Сьылам вöлi челядькöд сэки пöттöдз. Ёна нимавлiс миян знамя новлöдлан котыр, кытчö пырисны сiйöс видзысьяс да горнöн да барабанöн ворсысьяс. Миян школаысь татшöм котырас бура дыр вöлiны Алексей Липин, Валентина Лодыгина (öнi Попова) да Галина Нестерова (Чаланова). Кор кöть вöлi он чукöст, пыр и уськöдчасны быд уджö. На кодь водзмöстчысь челядьыс, дерт, вöлi уна, ставнысö казьтыштны он вермы. А кутшöм кыпыда кольлiсны пионеръяслöн лунö жö знамя новлöдлан котыръяс костын районса смотръяс, кытчö чукöрмывлiс матö 15 котырöдз. Ок и мича видзöдсис, синтö вештыны вöлi он вермы.

— Пионералан кад менам некор оз вун, олöмын тайö медся кыпыд да гажа здукъяс, — нюмсорöн казьтывлiс важсö Валентина Лодыгина, öнi Валентина Степановна Попова, школаын ичöт классъяс велöдысь. — Миян школаын дружина вöлi Зоя Космодемянская нима, а отрядным — Леонид Голиков нима. Классным вöлi зэв ёртасьысь, быд уджö уськöдчылiм öтув. Помнита, кыдзи чукöртiм бумага, кытшовтлiм орчча керкаяс, уджалан котыръяс, сдайтам вöлi сiйöс, водзöссö сетлiсны талон, мый вылö ньöбасьлiм небöгъяс вузаланiнысь. Тадзи жö чукöртлiм и пöим. Школалöн калидорын стенд вылын пасйылiсны, кутшöм класс уна-ö мый чукöртiс. Кутшöмкö класс кö суöдiс миянöс, пыр жö öддзöдчылiм да водзö чукöртiм сдайтанторсö, медым ордйöдны сiйöс. Татшöм ордйысьöм артмылiс миян пионеръяс костын. Оз вун и «Зарницаясын», слётъяс вылын петкöдчöм, май 19-öд лунö автобусöн сьыланкывъясöн ветлöм, ветеранъяслы отсасьöм. Эм мый казьтывлынысö.

Со татшöм водзмöстчысь быдтасъяс петiсны Вера Вячеславовнаöн юрнуöдöмöн да велöдöмöн.

А сёрöнджык сiйöс индiсны комсомол райкомö пионеръяслöн удж кузя инструкторöн. Сы бöрын уджыс содiс нöшта на, öд колiс нин кывкутны районса став школаын пионеръяслöн удж вöсна. Нуöдiсны ыджыд öтувъя альбом, кодöс велöдчанiнъястi кытшлöдлöмöн быдöн пасъялiсны сэтчö асланыс вöчöм удж йылысь. Чукöртöм гижöдъясыс, дерт жö, колисны районса важ олöмлöн лист бокö.

Олöмыс мунö водзö, сыкöд вежсьö и челядькöд уджаланног. И кöнi кöть эз зiль Вера Вячеславовна, школаын кöть пионеръяслöн ли челядьлысь енби сöвмöдан районса керкаын, пыр пуктылiс öти мог туйдыны-велöдны зонпосниöс, медым найö ичöтсянь пыдди пуктiсны да радейтiсны Айму, ёртасьöмöн да öта-мöдлы отсасьöмöн олiсны ас тшöтшъяяскöд, бура велöдчöмöн паськöдiсны вежöрлун, быдмисны бур патриотъясöн.

Вера Вячеславовна ловнас вöлi и колис пионерöн. Сiйö — збыльысь пионер-ветеран. Томуловöс туйдöм-велöдöмын ыджыд пай пуктöмысь Вера Вячеславовнаöс пасйисны велöдан министерствосянь да районса управлениесянь Почёт грамотаясöн, «За безупречную службу Республике Коми» Коми республикаса пасöн да уна мукöд ыдждöдланторъясöн.
Галина НЕСТЕРОВА.
Снимок вылын Вера Вячеславовна Потоцкая.