Кужйысь Ольга Анатольевна Кузнецова уна челядя мам. Ань 12 во нин зiльö поштаын. Уджалö и разöдчысьöн, и операторалö. Аддзö тай кадсö челядь, удж да шойччöм вылö. Ёна, дерт, отсасьö и аслас мамыс – Марина Николаевна Кузнецова, кодi уна во уджалiс Кужйын фельдшерöн. Öнi пенсия вылын да эм кад кокньöдыштны олöмсö öтка нывлысь да отсасьны внуквнучкалы.

 Ольга Анатольевналöн куимнан челядьыс олöны Кужйын, а велöдчöны Озъягын. Челядьлы нимъяс сетiсны батьыскöд öтув. На пиысь медыджыдыс Андрей велöдчö öкмысöд классын. Сiйö зiль зон. Ёна радейтö спорт. Ветлö мачасьны волейбол да баскетболысь. Регыд на мунiсны баскетбол кузя районса ордйысьöмъяс, кöнi кужса зонлöн команда шедöдiс коймöд места. 9 класс эштöдöм бöрын Андрей окотитö мунны велöдчыны карö. Мöвпалö пырны «СЛПК» акционер котыр бердса техникумö.

 Вера нылыслы 11 арöс, велöдчö витöд классын, крут öбичаа. Прöст кадö ветлö Кужса культура керкаö сьывны-йöктыны. Гортас радейтö серпасасьны. Ёна отсалö да велöдö öтуввез. Сэсь жö перъялö серпасъяс вылö эскизъяс. Октябрь тöлысьын Вералöн вöлi чужан лун. Мамыс ыджыд мамкöд öтув козьналiсны сылы мый колö серпасасьöм вылö. Ольга Анатольевна серти, челядьлы кö мусмö кутшöмкö туйвизь, налы таын колö отсавны.

 Медiчöт Сергей пиыслы 9 арöс. Шедöдö тöдöмлунъяс коймöд классын. Öнi заводитчас тöв да кутас исласьны лызьöн. Ольга Кузнецова кыдзи уна челядя мам лыддьö, мый мамъяслы медводз колö терпенньö. Сэсся мед челядь тöдiсны, мый налöн эм муса да дона мам, код вылö позьö мыджсьыны кöть кор, олан туй бöрйигöн кужны сетны колана сöветъяс. Прöст кадö Кузнецовъяслöн семья чукöртчö став рöдвужкöд. Öтлаын пасйöны гажъяс. Ёна радейтöны вöр-ва да тшöкыда ветлывлöны вотчыны, шойччыны да сöстöм сынöдöн лолыштны. Ольга Аанатольевна регыд на заводитiс ветлыны сьывны Кужлöн культура керкабердса «Ясные зори» котырö. Регыд на петкöдчис мамъяслы сиöм фестивальын. Ань висьталiс бур кывъяс аслас мам Марина Николаевна йылысь. Мый сiйö козьналiс Ольгалы олöм, велöдiс, век кужис сетны колана сöвет. Татшöмöн и колö лоны мамъяслы.
 Наталья Тимушева.
 Снимок Ольга Кузнецовалöн.