Аскиа луныс томъяс сайын. Тадзи шулiсны век. Челядь быдмöны, и воö кад бöрйыны специальносьт. Кытчö мунö велöдчыны миян том йöз? Тöдöмлун босьтöны оз сöмын республикаын, но и сы сайын.

Дiасёръяысь Сергей Курочкин нёльöд во велöдчö Пётр Великöй нима Санкт-Петербургса политехническöй университетын.
– Сергей, кутшöм урокъяс райдейтiн школаын?
– Физика, информатика, математика, англия кыв. Лыддя, меным мойвиис велöдысьясöн. Информатика, математика велöдіс Руслан Викторович Чигринов. Ме сылы висьтала зэв ыджыд аттьö – ён велöдысь да прöстö зэв бур морт. Ме öнöдз на кута сыкöд йитöд, век, кор воа гортö – зіля аддзысьлыны, сёрнитыштны сыкöд.

Ичöт классъясын миянöс велöдіс Елизавета Семёновна Карманова. Зэв ёна воисны сьöлöм вылö математика, миянöс кытшалысь мир, торйöн нин кыскис космос тема. Елизавета Семёновна пыр чуймöдiс выльторъясöн.

Öкмыс класс бöрын мамöн ышöдöмöн пыри физика да математика Сыктывкарса лицейинтернатö. Кöсйим кöкъямысöд класс бöрын, но вöлöмкö, босьтöны 7–öд да 9–öд классъяс бöрын. 9 класс помалi, да бара звöнитім лицейö. Миянлы вочавидзисны, мый математика кузя пыран баллыс 22 балл, менам вöлі 25 балл. «А» классъясын велöдчисны карса, а «б» классъясын – районъясса челядь, ме веськалі 10 «б» классö. Вöліны нöшта «в» классъяс – тайö карса да районса велöдчысьяслöн класс, но найö пыдiсянь велöдiсны химия да билогия. Медводдза кадас вöлi сьöкыд и велöдчöмын, и карлöн да школаинтернатлöн олöмö пырöдчöмын. Пыдiсянь нин сетiсны тöдöмлун медвылыс математикаысь. Но вочасöн велалi ставас. Дзик мöд ногöн нин видзöді химия вылö, весиг кажитчыны кутіс тайö предметыс. Велöдіс Оксана Романовна Мазурина – республикаса заслуженнöй велöдысь. Физика велöдіс Владимир Иванович Говырин, тшöтш зэв бур да сюсь, рочöн кö высококласснöй велöдысь. 11 классын ветлім Санкт-Петербургса горнöй университетö вузъяс костын математика кузя öтувъя олимпиада вылö. 11–öд классын ме стöча нин бöрйи информатика. Куті зіля дасьтысьны öтувъя экзамен кежлö. Роч кывйысь босьтi 90 балл, математикаысь – 92 балл, информатикаысь – 95 балл. Бур кывкöртöдъяс, ставнас – 277 балл. Кöть и зэв окота вöлі сдайтны информатикасö 100 балл вылö, но неуна эз артмы. Миян классын вöлі некымын морт, кодi босьтiс сё балл.

Ме пыр жö мöвпыштi, мый водзö велöдчыны муна Санкт-Петербургö. Сдайті документъяс нёль вузö: Санкт-Петербургса государственнöй университетлöн программнöй инженерия вылö, точнöй механика да оптика институтлöн кибербезопасносьт вылö, Санкт-Петербургса государственнöй аэрокосмическöй приборостроение университетлöн прикладнöй информатика вылö да Пётр Великий нима Санкт-Петербургса политехническöй университетö. Политехническöйсö и бöрйи да велöдча бöръя во нин, и ог каитчы.

Тані велöдысьяслöн зэв бур да ён котыр. Водзті кö тані программирование кузя вöлi куим да схемаяс кузя öти группа, то öні мöдарö öти – программирование да куим группа – схема. Сідзкö, коді кöсйö сэтчö мунны велöдчыны, то артыштöй тайöс. Бурджык мунны программнöй инженерия либö кибербезопасность кузя. Но висьтала веськыда, бöръя сертиыс зэв сьöкыд.

Могмöдiсны öтуволанiнöн, жырйын ми куим зон. Олам ёртасьöмöн. Сідзи артмис, мый ми куимнанным чужим öти тöлысьö. Нöшта менам да мöд зонлöн чужан лунным öти лунö, коймöдыслöн миян бöрын куим лун мысти. Вот тадзи сёрнитчытöг веськалім öти жырйö да олам нин нёльöд во.

Мöд курсын велöдчöмысь öтдор босьтчи уджавны специальносьт кузя. Меным кажитчö, босьта сям.
Сьöлöм вылö воис карыс. Висьтавны, мый сійö мича – нинöм шуны, тані колö лоны. Эм кытчö ветлыны прöст кадö.

Шыöдча том йöз дорö. Пуктöй ас водзаныд мог да энö полöй збыльмöдны сійöс. Медшöрыс, колö тöдны, мый тэ кöсъян, мый тэныд воö сьöлöм вылад, кöнi да кодöн тэ асьтö аддзан аскиа олöмын.
Сёрнитiс Марина Дадашова.
Снимок Сергей Курочкинлöн чукöртöмысь.